Covalima (RCCT) 29-05-23- Instituisaun Apoiu Dezenvimentu Emprezarial (IADE) realiza formasaun kona-ba area pekuaria nian ba grupu negosiu sira ne’ebe ho programa hanaran Kompetisaun Planu Negosiu Inovativu (KPNI) iha Munisipiu Covalima.
“Formasaun ida ne’e ami foka liu iha area pekuaria nian, kada tinan sempre realiza ami nia programa formasaun ida ne’e, ne’ebe ami bolu KPNI, IADE hanesan instituisaun autonomo tutela ba iha MKAE ninia reprezentante iha Munisípiu hanesan Centru Dezenvimentu Emprezarial (CDE), formasaun ne’ebe ohin halo abertura ne’e iha area Pekuária nian ba grupu negosiu sira iha Covalima” Kordenador IADE Munisipiu Covalima Roberto Alvaro Gomes ba jornalista sira hafoin realiza formasaun ba partisipante sira iha Salaun IADE Munisipiu Covalima, Segunda (29/05).
Nia hatutan formasaun ne’ebe IADE halo abertura ne’e iha area pekuaria nian, tanba ne’e maka iha kompetisaun ida ne’e iha partisipante hamutuk ema na’in-22 ne’ebe maka sei kompete iha kompetisaun ida ne’e depois se maka pasa iha kompetisaun refere sei tuir tan etapa tuir mai.
Nia afirma formasaun ne’e nia durasaun ba loron rua ohin segunda no sei remata iha tersa, iha formasaun ne’e ba loron primeiru sei ko’alia kona-ba hodi aprende hamutuk ho partisipante sira oinsa sira atu bele buka ideia rasik kona-ba negosiu ida ne’ebe maka diak.
Nia dehan ideia negosiu ida ne’ebe iha viabel ba sira nia atividade ne’ebe maka sira iha hodi bele hala’o sira nia atividade negosiu.
