Covalima (RCCT) 21-01-21- Komandante Operasaun PNTL-Covalima, Inspectur Xefe Gaspar Mendonça da Costa Informa ba Radio Cova Taroman kazu nebe PNTL-Covalima rejista hamotuk 195 nebe mak ho tipo krime oin-oin, mak hanesan kazu asaltu malu, Violensia Domestika no asaltu seksual, husi tipu kazu hirak ne’e kazu asaltu malu mak numeru aas iha munisipiu covalima. Dehan Komandante Oprasaun Inspectur Xefe Gaspar Mendonça da Costa ba RCCT Tersa Feira (19-01-21) iha nia Knar fatin.
“ Iha tinan 2020 PNTL Munisipiu Covalima rejista kazu 195 no kazu hirak ne’e enkaminha hotu ba iha Ministeriu Publiku hodi halo” dehan Inspectur Xefe Gaspar Mendonça da Costa iha Quarter Jeral PNTL-Covalima.
Inspectur Xefe Gaspar Mendonça da Costa salienta, atu minimiza numeru hodi labele mosu bebeik kazu nebe hanesan maka PNTL destaka ona Oficial Polisia Suco (OPS) iha suku 30 nebe lokaliza iha Municipiu Covalima.
“PNTL estabelese ona Ofisial Polisia Suco iha Suco hotu-hotu iha Municipio Covalima, ita orienta nafatin OPS hanesan komando Polisia Munisipiu nia ain liman nebe halo knar iha Suco to’o Aldeia, entaun liu husi OPS sira ita nafatin halo patrulhamentu no mos hakbesik an nafatin ba iha komunidade hodi minimiza numeru kazu nebe ita rejista”,Tenik komandante operasaun Inspectur Xefe Gaspar Mendonça da Costa.
Komandante Polisia Operasaun Covalima Inspectur Xefe, Gaspar Mendonça da Costa mos husu ba komunidade, liu-liu ba juven sira atu idak-idak hakmatek iha fatin hodi hala’o idak-idak nia aktividades, nune’e bele kontribui ba pas no stabilidade iha Covalima.
Reportazen : Ade Gorete/Asatu Soares
Editor : Chamot Nahac
