Covalima (RCCT) 21-01-25- Hilario Oliveira, motiva komunidade agrikultor sira iha Munisipiu Covalima atu badinas halo to’os no natar nune’e hodi aseguran seguransa ai han iha ida-idak nia uma kain.
Diretor Servisu Munisipal Seguransa Alimentar Munisipiu Covalima Hilario Oliveira, hatete kondisaun klima iha tinan ne’e, udan komesa tun la para nine’e komunidade agrikultor sira tenki aproveita kuda produtu iha to’os laran nune’e asegura ai-han.
“Agora ita hare udan ben di’ak espera katak sei fo rezultadu di’ak, ba tinan ida ne’e. Ita hare ba situasaun klima di’ak atu bele aproveita ba kuda kualker ai horis ne’ebé ita han, bainhira ita kuda nia fo produsaun di’ak, ita asegura katak seguransa alimentar iha ita nia nivel familia to’o nivel munisipiu bele garante katak ai han seguru ba ita” dehan Diretor Servisu Munisipal Seguransa Alimentar Munisipiu Covalima Hilario Oliveira.
Nia dehan siguransa alimentar la ses husi atividade ne’ebé Agrikultor sira hala’o, tan ne’e, waihira to’os na’in sira badinas fila rai mak sei kontribui ba garantia aihan seguru iha munisipiu covalima.
“Badinas nafatin, halo nafatin vida agrikultura ne’e hanesan, tanba seguransa alimentar ne’e la ses husi vida agrikultura, oinsa ema bele han, bele hemu ne’e bele halai fila fali ba oinsa ita nia komunidade sira badina para atu produs ai han iha ida-idak nia to’o laran rasik” nia dehan.
Tanba Diretór Servisu Munisipal Seguransa Alimentar Munisipiu Covalima Hilario Oliveira, kontinua husu komunidade hotu atu aproveta udan ne’ebé hodi kuda kolker produtu nune’e bele fo produsaun di’ak iha futuru hodi bele hodi asegura seguransa ai-han iha ida idak nia uma laran.
Jornalista : Julio Salinas
Editor : Chamot Nahac
