Iha Aprenzentasaun ne’e, Activity Manager ONG HAMNASA, Gerson Martins Relata, hetan apou fundu husi povu amerikanu liu husi USAID hodi implementa atividade responde integradu ba violensia baseia jeneru iha munisipiu-4.
“Projetu hakotu bareira hari moris di’ak hanesan responde integradu ba violensia baseia ba jeneru iha Timor-Leste, ne’e programa ka atividade ida ne’ebé maka USAID liu husi povu Amerikanu ninian hanesan duador uniku hodi fo apoiu no suporta no fo fiar ba ONG HAMNASA atu bele implementa ninia atividade iha munisipiu 4 hanesan Munisipiu Munisipiu Ermera, Likisa, Bobonaro no Covalima, ita halo advokasia iha nivel munisipiu ne’ebé ohin loron realiza iha Covalima hodi bele hasoru malu ho autoridade munisipiu sira hotu ne’ebé ohin partisipa husi administrador postu administrativu na’in 4 ne’ebé hola parte ba iha advokasia nivel munisipiu no mos diretor sira no reprezentante husi sosiedade sivil sira ne’ebé maka implementa sira nia programa no projetu Covalima, ami sei la halo advokasia iha nivel munisipiu maibe sei halo advokasia postu administrativu sira hanesan foin daudauk halo ona planu asaun ne’ebé iha tempu besik sei bele hala’o iha nivel postu, depois de advokasia ami mos sei tun ba iha nivel suku hodi implementa atividade sira hamutuk ho komunidade sira iha nivel suku to’o nivel aldeia” Relata Activity Manager ONG HAMNASA, Gerson Martins ba jornalista RCCT iha Salaun enkontru Administrasaun Postu Administrativu Suai Tersa (19/03).
Administrador Postu Administrativu Maukatar Laurentino de Jesus, konsidera programa ne’ebe ONG HAMANASA hala’o iha Covalima ne’e importente atu evita violensia bazeia ba jeneru tanba dadaun ne’e numeru kazu violensia domestika komesa as iha Covalima.
“Programa ida ne’e kapas tanba atu evita problema violensia domestika bazeia ba jeneru iha suku no aldeia ne’ebé ami horik ba, tanba ohin iha aprezentasaun husi komandante VPU Covalima dehan katak violensia domestika iha ha’u nia suku maka numeru as liu, ho ida ne’e ha’u sente orgullu, programa ida ne’e tenki hakat duni ba iha ha’u nia postu, suku no aldeia para oinsa atu fahe informasaun hodi hamenus problema violensia domestika, ha’u sujere mos ba ONG HAMNASA atu bele hak’bit feto iha vida ekonomia atu nune’e bele redus violensia domestika iha aldeia no suku ne’ebé durante ne’e akontese, iha parte ida mos ONG HAMNASA bele kapasita feto sira sai lideransa, ida mos importante iha tempu ida ne’e bele ba halo sosializasaun to’o iha baze, maibe ami sei hare, signifika suku 4 ne’e iha suku ida ne’ebé as liu ami sei halibur hamutuk para oinsa bele mai rona programa HAMNASA maka atu hato’o ba partisipante sira ne’ebé sei realiza iha fulan oin mai” nia dehan.
Responsavel Oragnizasaun Fokupers iha Munisipiu Covalima, Maria Madalena do Carmo mos konsidera, ONG HAMANASA nia prezensa, bele hakbit servisu rede referal iha Covalima hodi tau matan lisuk, fo asisntensia no halo prevensaun ba violensia bazeia ba jeneru tanba ne’e Madalena husu ba Feto Sira atu brani no labele tauk atu keixa konaba violenesia ne’ebé sira hasoru.
“Ha’u nia mensajem ba feto maluk sira hotu katak labele tauk hasoru violensia tanba ita iha rede barak ne’ebé maka servisu halo atendimentu no fo asistensia ba ita nia problema hirak ne’e, tan ne’e ha’u rekomenda ba ha’u nia maluk feto sira liliu iha Munisipiu Covalima laran tomak katak ita iha organizasaun barak ne’ebé maka servisu fo asistensia ba maluk feto sira karik hasoru problema, dalan iha oinsa ita atu hato’o keixa ba iha VPU no organizasaun sosiedade sivil sira ne’ebé ejiste iha Covalima” nia husu.
ONG HAMNASA hanesan parseria uniku ho USAID hodi implementa atividade Hakotu Bareira Hari Moris Di’ak, hodi responde integradu ba violensia bazeia ba jeneru.
Entretantu ba atividade ne’e ONG HAMNASA sei uza aprosimasaun rua maka hanesan Komunidade no Klinikal. Nune’e koanaba Komunidade, ONG HAMNASA sei implementa atividade Mikro Planu Komunidade (CMP), ne’ebé sei servisu ho grupu mane, no atividade servisu haforsa ekonomia feto, ne’ebe mak sei implementa iha Suku 62 kompostu iha munisipiu 4 hanesan Munisipiu Bobonaro, Covalima, Ermera no Likisa. no iha parte Klinikal sei haforsa sistema servisu saude liu husi fo formasaun intensivu konaba Violensia Bazeia ba Jeneru, ba pesoal saude sira hotu liu husi sentru saude 7 iha Covalima.
Editor : Chamot Nahac
