Covalima (RCCT) 29-10-23–Postu Administrativu (PA) Suai simu ona rezultadu eleisaun orgaun ba periudu 2023-2030 husi Suku Kamanasa nian, ho rezultadu kandidatura ho numeru sorteiru 4 Fernando Noronha hetan votus total-637 no kandidatura ho numeru sorteiru 6 Rosito de Araujo Monis hetan votus total 670.
Nune’e Kandidatu Fernando Noronha no Rosito Monis mak avansa ba eleisaun segundu volta ne’ebe sei realiza iha loron 15 mai. Observador Postu Administrativu Suai, Augosto Borges reprezenta Administrador Postu Suai hafoin simu akta husi Prezidente Meza Suku Kamanasa hatete relasiona ho rezuntadu eleisaun suku ba primeiru ronde mak mak iha suku kamanasa sei avansa ba segundu ronde iha loron iha loron 13 fulan novembru tinan 20230.
“Ba eleisaun suku no aldeia iha 2023 nian ne’ebé rezultadu apuramentu akta suku ninian agora daudaun ha’u simu ona akta apuramentu nian ba primeiru ronde ho ninia rezultadu maka agora ha’u kaer hela no depois Suku Kamanasa sei tama ba iha segundu Volta ne’ebé sei monu iha loron 13 Novembru 2023 ida ne’e mak apuramentu husi Suku Kamanasa ninian” informa Observador Postu Administrativu Suai, Augosto Borges ba jornalista iha Sede Suku Kamanasa, Domingu ne’e.
Nia afirma durante prosesu eleisaun iha Kamanasa la’o tuir duni regras husi orgaun tekniku Sekretariadu Tekniku Administrasaun Eleitoral (STAE) no Komisaun Nasionál Eleisaun (CNE).
“Durante eleisaun suku no aldeia nian hanesan observador nia observasaun ba Suku Kamanasa ninia lala’ok la’o tuir regras STAE no CNE ninian no laiha konflitu ne’ebé asegura husi seguransa polisia no hetan apoiu husi unidade polisia Maritima no unidade seguransa sira seluk iha Suku Kamanasa ne’e la’o ho diak” nia afirma.
Kandidatura Suku Kamanasa Fernando Noronha hatete hafoin simu rezultadu eleisaun hodi tama ba segundu Volta sei konvense komunidade tomak iha Kamanasa bele manan iha eleisaun segundu Volta ne’e.
“Tama ba segundu Volta ne’e hau sei halo kontinuasaun husi primeiru ronde nian ida ne’e mak ami la’o, no ba segundu volta ne’e hau sei konvense didiak komunidade tomak atu nune’e tama ba segundu Volta ne’e bele manan” nia dehan.
Nune’e mos Kandidatura Xefe Suku Kamanasa Rosito de Araujo Monis, hatete iha eleisaun suku ba periudu 2023-2030 iha Kamanasa sai vensedor hodi hakat ba segundu Volta iha ema na’in-2. Nune’e Rosito garantia iha eleisaun segundu Volta sei manan maioria iha suku Kamanasa tanba iha ona vizaun ho misaun hodi haklaken ona ba komunidade sira iha Suku Kamanasa.
“Iha segundu Volta ha’u optimis hakat ba segundu Volta ne’e sei manan maioria tanba iha vizaun ho misaun ne’ebé durante ne’e ha’u haklaken ba komunidade iha aldeia 4 hanesan Aldeia Ailok Laran, Manekin, Fatuisin no Sanfuk, ida ne’e mak ha’u sei haklaken nafatin no esforsu ha’u nia an hodi manan iha eleisaun segundu Volta ne’e” nia esplika.
Eleisaun ba orgaun suku ba periudu 2023-2030 iha Suku Kamanasa total kandidatura hamutuk na’in-6 kompostu husi kandidatura Adelino Amaral Relvas hetan votus-118, Ana Maria Pereirra hetan votus 131, Emelito Rego do Nascimento hetan votus-62, Fernando Noronha hetan votus -637, Herminio da Silva hetan votus total-412 no kandidatura Rosito de Araujo Monis hetan votus total-670, husi rezultadu ida ne’e maka hakat ba segundu Volta kandidatura Fernando Noronha no Rosito de Araujo Monis.
Jornalista : Julio Salinas
Editor : Chamot Nahac
