Covalima—-Xefe Unidade Lisensamentu Floresta Nasional, Aplonario Freitas, husu ba governu foun mai ne’e se deit maka kaer ukun tenke tau planu ida ne’ebe diak hodi halo rekrutamentu tan ba iha guarda floresta liliu ba iha Covalima.
“Tanba ne’e hau sujere ba governu foun mai ne’e se maka lidera Ministeriu Agrikultura no Peska tenke halo rekruta tan guarda ne’e barak liu tan nune’e hodi bele halo kontrolu ba ai laran sira ne’e ho diak” deklara Xefe Unidade Lisensamentu Floresta Nasional, Aplonario Freitas, ba jornalista sira iha resintu Guarda Floresta Munisipiu Covalima Kinta (01/06).
Nia haktuir area floresta ne’e luan tebes maibe ho corpu guarda floresta menus sira sei labele halo kontrolu ai laran sira ne’e ho masimu.
“Hau fo ezemplu ki’ik ida jardim ida iha Palasiu Governu nian oin seguransa iha ne’eba barak la halimar, mas ema sei kuu no silu estraga ai funan sira iha ne’eba tun sae, sa tan ai laran ida ne’ebe luan la halimar ho ninia topografia ida ne’ebe tun sae difikulta corpu guarda floresta sira kontrolu, tan ne’e husu nafatin ba iha governu tau atensaun hodi rekruta tan guarda floresta” nia sujere.
Aplonario afirma diresaun ida-idak hato’o ninia proposta maibe tanba kapasitasaun kona-ba orsamentu maka limitadu iha diresaun ida ne’e hodi difikulta, maibe la ejiji, esperitu guarda nian forte para hodi hala’o, sira nia esperitu forte tebes ne’e duni.
Tanba ne’e husu nafatin bele apoiu iha tempu badak ne’e para sira bele hala’o sira nia knar ne’e ho diak liu tan iha futuru oin mai, tan sira halo kontrolu ba iha area ida floresta ne’e luan tebes.(azu)
