Hasara ba Radio Comunidade Cova Taroman (RCCT), Vitima Julião Lopes Amaral, hatete, Nia toba dukur derepente hafokdak tanba rona ema deskoñesidu tama bairo laran hodi tuda kona ninia uma foin hakfodak, hala’i sai hodi hare ba vidru janela sira rahun total.

“Kori kalan Jam 2 ha’u toba dukur loos derepente ema tama serang tuda uma ne’e maka ha’u hakfofak, hala’i sai hodi hetan janela uma sira ne’e rahun hotu, karik kalan ne’e ha’u la hala’i sai mate, ha’u hala’i sai ba iha uma kotuk klinika nian, ha’u lahatene ema sira ne’e mai husi ne’ebé, tanba akontese iha kalan bo’ot toba hakfodak mai fatuk mesak bo’ot maka ema lori tuda rahun janela sira ne’e, ne’ebé ita atu hatene ba se loos, ita la halai mate, uma deit ema bele estraga ona satan ema bele mate liu, tan ne’e husu ba iha parte seguransa toma atensaun ba problema ida ne’e hodi kaptura hotu ema kriminozu sira ne’e” informa vitima Julião Lopes Amaral ba RCCT iha Sanfuk, sabado (24/02).

Iha Sorin Seluk Vitima Matias Amaral mos fo sasin konaba akontesementu ne’e, ema deskoñesidu tuda vidru uma nian rahun, hader husi kama leten nia helik iha Parede/tembok tanba ema komesa tuda tama fatuk ba nia uma laran.

“Vidru tarutu rahun monu tun mai iha kama laran ha’u hakfodak hader mai foti telefoni leno haree tuku 2, ita toba dukur la rona buat ema lian hakilar iha liur ha’u hader mai la kleur vidru mos tarutu ha’u hader heli an ba iha tembok ne’e lae karik fatuk ho vidru rahun sira ne’e kona ha’u, ha’u la halai sai ba liur tanba tauk haree ba ema barak loos, ita sai ita mate di’ak iha uma laran de’it ona, ha’u la hatene ema sira ne’ebé mai tuda ne’e tanba kalan mos boot” nia konta.

Alende ne’e Vitima Jesuinho do Carmo relata kronolojia relasiona ho ema deskoñesidu harahun komunidade sanfuk nia uma 9 no motorizada 1 rahun total, deposi akontesementu ne’e, iha oras tuku 5:49, derepente Jpven na’in 4 ne’e nia la kuñese, mai hakiral, tolok no tuda Jesuinho iha uma.

“primeiru ne’e sira tuda malu iha estrada ne’eba, maibe ha’u la mete problema ne’e tanba sira ne’e lao’s foin maka akontese tuda malu maibe sira tuda malu ho ida ne’e dala 3 ka 4 ona ne’ebé ha’u mos la ba iha ne’eba, ha’u rai manas ne’ebé nahe biti toba iha branda uma oin nian ne’e maibe to’o dader 5:49 derepente ema mai konsege sira na’in-4 mai hamrik iha uma oin ne’e sira hafuhu ha’u hetan tiha sira dehan nia maka, ha’u mos hakfodak nusa imi mai ne’e depois sira hasai lia fuan mal eduka mai ha’u dehan hoe asu nonok o maka lori ema sira mai, depois ha’u hatan ba sira dehan imi problema iha fatin seluk mai tan ha’u, ha’u mak sala ka ema lao iha dalan imi maka tuda depois fa sala mai ha’u, sira hatan fali mai ha’u dehan asu nonok langsung fatuk mos mai daudauk ha’u hamrik iha portaun ne’e hakruk hodi subar salava an depois fatuk mos mai nafatin sira hodi hakilar ba ha’u dehan se o brani sai, ha’u helik an nafatin hodi simu sira nia lia fuan dehan imi mane ne’e tama mai deit iha ha’u nia uma laran labele hakilar husi estrada deit, sira hakilar dehan asu o nonok o hein atu to’o iha ne’ebé rai naroman maka foin haree malu di’ak rai sei nakukun ne’e husik ba, bainhira ha’u haree rai naroman hobun malu moos ona ha’u sai husi ne’e ba fo hatene ba iha parte seguransa” nia konta.

Iha sorin seluk, Vitima Gaudencia Martins hatete bainhira rona tarutu iha uma sorin, nia hader mai foti labarik lori halai sai husi uma kotuk, hafoin iha oras haleu tuku 3 nia fila hodi ba hare uma vidru ema tuda rahun hotu.

“Ha’u rona tarutu iha ne’eba ha’u ko’us labarik ne’e hodi halai sai, odamatan mos la taka tan ha’u fila fali mai hare oras 3 atu tama ba tuku 4 madrugada ne’e, hare vidru sira rahun hotu ona, ha’u lahatene ema sira ne’ebé mai halo asaltu hodi tuda ha’u nia uma ne’e tanba iha kalan bo’ot” nia konta.

Domingos Bere konfesa ba RCCT katak nia laiha relasaun ho problema ne’e maibe obrigadu nia tenki sai mos vitima ba aktu brutalizamu husi grupu deskonesidu tanba wainhira dader hare mai hare nai odamatan bengkel kuak no fatuk nakonu iha uma laran.

“ha’u toba iha uma kraik ne’eba dader mak foin sa’e mai foin hare fali sasan sira ne’e rahun, fo hatene ona ba iha parte polisia investigasaun ona maibe sira dehan ita bo’ot ba fo hatene uluk lai offisial Polisia suku (OPS) Kamanasa ne’ebé agora ha’u sei tur hein hela ne’e” nia dehan.

Informasaun ne’ebé Jornalista Radio Komunidade hetan iha terenu ka fatin akontesimentu, katak grupu deskoñesidu ne’e fila husi familia nia lia 40 hari (loron 40) iha Aldeia Tabako Loot, Suku Debos, Postu Administrativu Suai, maibe to’o iha Sanfuk derepente ema balu hein iha dalan lori fatuk tuda maka foin hamosu problema refere ikus mai rezulta uma 9 no motorizada ida rahun total.

Engkuantu Polisia Identifika Ona Ema na’in 3 Ba Kazu Asaltu Malu Iha Sanfuk ne’ebe rezulta komunidade nia uma 9 rahun no motorizada 1 dodok total.

Komandante PNTL Munisipiu Covalima Superientendente Polisia Calisto Gonzaga, informa ba radio cova taroman relasiona ho konflitu iha Aldeia Sanfuk, Suku Kamanasa, iha sabado 24 foin lalais, maka to’o iha segunda loron 26, komando polisia Munisipiu Covalima liu eskuadra Suai bolu ona ema na’in tolu hodi submente ba investigasaun.

“iha 24 de febreiru dadersan madrugada problema ida ne’ebé ataka malu entre joven sira, depois akontesimentu ne’e rezulta ema na’in 9 maka sai vitima no sasan sira ne’ebé hetan estragus maka uma kain-9 no motorizada ida, maibe ita identifika ona ema na’in 3 sai suspeitu ba prosesu ida ne’e, agora la’o hela, ita identifika tiha ona ema na’in-3 para bele submete ba prosesu tuir mai ba problema ida ne’e,” Komandante PNTL Munisipiu Covalima Superientendente Polisia Calisto Gonzaga, esplika iha nia k’nar fatin segunda (26/02).

Komandante Calisto Konfirma konaba informsaun balu dehan domingo (25/02) mosu tan barrulu iha Sanfuk no Dais “Hori kalan mos mosu akontesementu ida dentru de ida ne’e mais no fin ita haruka ita nia membru sira ba husu tuir; primeiru ida maka lia depois sira la simu malu maka sira baku malu entre familia sira ne’ebé maka halo lia ne’e depois ema deskoñesidu balu mai dere fali ponte Mali Loek dentru de Dais ho Sanfuk nia let, entaun sira husi Sanfuk mos hahu ona atensaun dehan katak ema mai ataka fali entaun alerta ema hotu hader mais la konsege buat ruma hori kalan tanba problema ne’e iha Dais ne’eba familia ninian, kultura ninian tanba deit problema ne’ebé maka tau sasa hamutuk maka la kona malu halo sira hirus malu to’o baku malu, mais ema seluk aproveita tempu ida ne’e hodi halai mai baku besi ponte nian sira husi Sanfuk rona besi ida ne’e signifika katak ema maka atu mai ateka sira maibe lae hori kalan ne’e” Komandante PNTL Munisipiu Covalima Superientendente Polisia Calisto Gonzaga, konfirma.

Komandante Polisia ne’e haktuir, dadaun ne’e situasaun hakmatek iha Sanfuk no Dais, no aturidade siguransa nafatin Alerta atu orienta membru sira hodi halo atuasaun iha terenu atu halo atuasaun no povu bele moris hakmatek. No mos Polisia toma nota ona atu notifika ba ministeriu publiku hodi foti medida judisiariu ba autor sira.

Jornalista : Julio Salinas

Editor       : Chamot Nahac