Covalima (RCCT) 21-02-25- Ministru Komersiu no Industria Filipus Nino Pereira hamotuk ho komitiva ne’ebé akompaña husi Prezidente Autoridade Munisipiu Covalima no Komandante PNTL Covalima, hala’o observasaun hodi hatene konaba kondisaun Merkadu Ladi Suai.
Governante ne’e ko’alia ba Jornalista sira iha Merkadu Ladi Suai dehan, komunidade fo ona rai hamotuk hektar hat ba estadu, tanba ne’e Governu sei tau planu hodi halo konstrusaun foun ba merkadu Ladi Suai ne’ebé iha Futuru sei sai merkadu munisipal.
“Iita defini ona katak konstrusaun merkadu iha fatin ida ne’e, estatutu rai mos klaru ho hektares-4, komunikasaun ho ita nia komunidade sira iha ne’ebé hela besik iha area merkadu ida ne’é inklui ba asesu estrada tama no sai, konforme informasaun tama husi PAM katak ida ne’e koloka ona ne’ebé mai duni husi komunidade sira, importante ita hotu bele kopera para kontribui dezenvolvimentu bele la’o buat ne’ebé bele liga ba asuntu ekonomia, ba dezenvolvimentu ekonomia ba interese ema hotu nian, espera katak tinan ida ne’e bele halo ona estudu dezenu nune’e tinan oin bele hahu konstrusaun ba merkadu munisipal” Ministru Komersiu no Industria Filipus Nino Pereira, ko’alia ba jornalista sira iha Merkadu Ladi Suai (21/02).
Fatin hanesan Prezidente Autoridade Munisipiu Covalima, Miguel Armada Cardoso “Razão” Informa komunidade negosiante sira hahu fila liman kada loron sabadu utiliza merkadu ladi suai komesa iha tinan 2015.
“Uma sira ne’e hari iha tinan 2004, ita husik hela abandona, maibe iha tinan 2015 ha’u asume pasta nudar Administrador Postu Suai no ha’u hamos fatin ida ne’é hodi muda tiha bazar kada sabadu mai iha merkadu kapital ida ne’e, maibe loron baibain bazar ne’e iha merkadu tuan ne’ebá, depois ida ne’e durante ne’e ita iha dalan tama sai la iha, maibe liu husi ita nia aproximasaun ne’ebé kapas ho ita nia komunidade na’in ba rai, sira halo akta sorumutu ida depois sira mos oferese sira nia rai, ita hamos ona dalan sai, agora dadaun ita iha, atende dalan sai no tama ita iha problema uitoan bainhira akontese udan hamosu tahu barak, tanba ida ne’e maka iha planu ida ho vizita ministru nian hodi hare direita katak ida ne’e di’ak Automatikamente iha ona planu, dezenvolvimentu bele akontese iha 2026, agora iha planu hela, nudar autoridade nia papel atu hare mos kestaun balu liliu identifika ona ba tahu sira ne’é depois mai iha fatin sintina ka so’e bee sira ne’e araska tebes tanba ida ne’e maka ami forma ona ekipa ida halo levantamentu dadus hodi hato’o katak ida ne’é maka problema oin nusa maka bele resolve hanesan foin dadaun dalan sai” dehan Armada,
Enkuantu Ministru Komersiu no Industria Filipus Nino Pereira, katak iha ona orsamentu atu utiliza hodi halo estudu ba dezenu Mekadu Munisipal Covalima, ba fundus infrastrutura, ne’ebé preve husi Ministeriu Planu Investimentu Estratejiku.
Jornalista : Julio Salinas
Editor : Chamot Nahac
