Covalima (RCCT) 11-05-25-Governu no Igreja katolika ingaura ona kapela São Miguel Arcanjo iha suku Suai Loro, Postu Administrativu Suai, Munisipiu Covalima ho medida luan metru 16 no naruk Metru 20 ho total orsamentu ba konstrusaun kapela foun ne’e hamotuk dolar amerikanu rihun tolu nulu resin ne’ebé apoiu husi GOvernu timor leste liu husi Gabinete Apoiu Sosiedade Sivil.
Iha Misa Inaugurasaun ne’e, Amo vigariu jeral diosese Maliana Pe.Lucio Norberto de Deus, iha nia omilia hatete uma kreda hanesan fatin ba sarani sira atu rona maromak nia lian, hatudu fiar ba maromak iha moris loron loron.
“Ohin ita mai halibur hamutuk iha ne’e hodi fo bensa ba ita nia uma ida ne’e no mos lori hatudu ba ita nia hamutuk nudar ema sarani iha fatin ida ne’e. Ne’e duni maluk doben sira jesus ninia liafuan ida ohin ne’ebé nia hatete ha’u nia bibi sira rona ha’u lian, katak nia tau mos konfiansa ba iha nia bibi sira ne’e, ita buka atu hamoris nafatin sensiblidade rona nai maromak nia lian. Fiar ida iha kreda katolika nian no ema ne’ebé rona maromak nia lia no rona jesus nia lian nia sei la husik ninia maluk sira hodi la’o let ninian maibe nia nafatin ho nia maluk sira,” Pe.Lucio Norberto de Deus dehan.
Prezidente Autoridade Munisipiu (PAM) Covalima, Miguel Armada Cardoso (Razão) apresia ba sarani no komunidade Suku Suai Loro nia unidade no esforsu hodi hari ona kapela São Miguel Arcanjo, tan ne’e nia husu nafatin ba ema hotu atu hametin konsensia hodi kuidadu edifisiu kapela foun ne’e.
“Agradese ba ita bo’ot sira ne’ebé ho hanoin di’ak hodi hari uma fukun ida ne’e no fo hanoin nafatin liliu husu ita bo’ot sira nia fiar ne’ebé mak ita iha no liu husi ita bo’ot sira nia servisu hamutuk ne’ebé mak ita bo’ot sira implementa ona hametin nafatin. Kuidadu ita nia uma lulik ida ne’e ho di’ak liliu ba joven sira no mos ba komunidade sira hotu atu kuida nafatin ita nia uma lulik ida ne’e ho di’ak” PAM Covalima dehan.
Entretantu kapela são Miguel Arcanjo hahu implementa atividade konstrusaun iha tinan 2023 no inagura iha loron 11 fulan Maio tinan 2025 ho nia medida 16×20 total orsamentu hamutuk dolar amerikanu rihun tolu nulu resin tolu, liu.
Iha serimonia inagurasaun kapela São Miguel Arcanjo ne’e partisipa husi Amo sira no Prezidnte Autoridade Munisipiu Covalma ho ninia estrutura, sarani sira husi Suku Suai Loro inklu Amo Lulik no Sarani sira husi betun Malaka NTT, Indonesia.
Jornalista : Alfredo Barreto
Editor : Chamot Nahac
