Iha lansamentu ne’e, Ministra Finansa Santina J.R.F. Viegas Cardoso, iha nia deskursu hatete, timor leste persija makina professional hodi bele kontrola investimentu iha fronteira, asegura no aselera komersiu hodi labele prejudika kustu ba merkaduria importadu.
“Prezensa makina ida ne’e, nia kustu por volta de 2.6 milaun dolares, kustu ida ne’ebé mak bo’ot, maibe ne’e hanesan investementu ida mak ita halo iha ita nia fronteira, investementu ne’ebé mak ita halo bele iha valor kuandu ita uza ho didi’ak, ekipamentu hanesan meius ida atu bele garanti katak meius ne’e bele fasilita duni atu evita mos liu liu ofisial sira ne’ebé mak servisu iha ne’e tanba dala ruma quandu ita halo cek sasan ho manual ne’e han tempu liu, entaun ita la fasilita merkadoria para atu bele lalais” dehan Ministra Finansa, Santina J.R.F. Viegas Cardoso.
Partisipa iha Lansamentu ne’e, Sekretariu Munisipal Asuntu Sosiais no Organizasaun, Filomeno Cardoso, husu ba teknika sira atu utiliza didi’ak makina ex-ray no body inspection hodi halo servisu atendementu komersiu iha fronteira Postu Integradu Salele.
“Aproveita oportunidade ida ne’e ha’u mos hakarak husu ita bo’ot sira hotu servisu ho kuidadu servisu uza ita nia sasan hirak ne’ebé atu bele konteze ita nia isin bolu dehan “body protection”, atu nune’e ita bo’ot sira mos bele asegura husi servisu hirak ne’e, tanba ita bo’ot sira maka sai na’in sai autor prinsipal hodi asegura sasan hirak ne’ebé mak tama ba ita nia nasaun Timor-Leste ida ne’e” katak Sekretariu Munisipal Asuntu Sosiais no Organizasaun, Filomeno Cardoso.
Lansamentu ne’e partisipa husi Autoridade Servisu fronteira Motamasin Malaka NTT Indonesia, reprezentante Bupati Malaka, Kapolres Malaka, Beacukai Indonesia mak destakada iha Fornteira Mota Masin Malaka NTT, no Autoridade Covalima reprezenta husi Sekretariu Munisipal Asuntu Sosiais no Organizasaun, Komandante PNTL Covalima, Reprezentante Ministeriu Intereior, no partisipa direta husi Ministra Finansas, Komisariu Autoridade Aduaneiru Interinu, Funsionariu Alfadega sira no mos instituisaun sira mak destakada iha fronteira postu integradu salele.
Jornalista : Moichung
Editor : Chamot Nahac
