Prezidente Komisaun Regulador Arte Marsiais (KRAM) Timor-Leste Octavio da Conceicão, hatete governu deside liu husi reuniaun konsellu ministru hamosu rezolusaun governo Nu. 45/2023 10 de Novembru, tan ne’e governu foti desizaun hodi suspende atividades treinamentu organizasaun arte marsiais, la’os taka arte marsiais.
“Fiskalizasaun ida ne’e la’os hanesan fiskalizasaun baibain, fiskalizasaun ida uluk ami halo ne’e bazeia ba lei Nu. 5/2017 ne’e hakerek nanis ona ami nia servisu maka fiskaliza, ohin ha’u mai ne’e estadu, governu tomak deside liu husi rezolusaun foun rezolusaun governu Nu. 45/2023 10 de Novembru, rezolusaun ida ne’e sai depois de akontesimentu hahu iha fulan Janeiru to’o 3 de Novembru iha Bobonaru, Lourba, Karbau, maibe la’os ida ne’e deit akontesimentu iha Lospalos, Baukau, Ainaro, Covalima ikus liu mak iha Bobonaro sunu povu nia uma to’o motuk, tanba ne’e nonu governu ne’ebé lidera husi Primeiru Ministru Kay Rala Xanana Gusmão foti desizaun, suspende atividades treinamentu durante fulan 6 nia laran,” informa Prezidente Komisaun Regulador Arte Marsiais (KRAM) Timor-Leste Octavio da Conceicão, ba RCCT iha Zumalai.
Prezindete KRAM dehan “labele rona fali ema sira ne’ebé hakerek iha media sosial facebook katak governu taka arte marsiais, maibe la’os hanesan ne’e governu suspende atividade treinamentu pratika arte marsiais ba fulan 6, ida ne’e ha’u mai ko’alia sai iha Covalima reprezenta estadu hamutuk ho komando PNTL” Teni Nia.
Kordenador KORK Munisipiu Covalima Justinho Guterres Maia, durante governu suspende atividade treinamentu ne’e fo tempu ba organizasaun arte matrsiais hotu atu bele hadi’a kondisaun ba fatin ba pratikante sira.
“KRAM mai halo refiskalizasaun mai iha ami nia ranting iha Postu Administrativu Zumalai ne’ebé balu prepara masimu no balu seidauk prepara masimu, tanba ne’e ami sei hein iha loron 90 ida ne’e oinsa ami bele halo preparasaun di’ak liu tan, nune’e KRAM bele aprezenta ba iha konsellu ministru ida ne’e bele hadi’a di’ak liu tan, durante ne’e ami hasoru iha ami nia ranting ninia problema maka preparasaun ba sede ranting, no rai sira ne’ebé durante ne’e organizasaun arte marsiais KORK uza ne’e sei provizoriu” nia dehan.
Kordenador PSHT Munisipiu Covalima Eujebio do Nascimento (Egy) apresia ho KRAM halo re fiskalizasaun ba organizasaun arte marsiais sira iha Covalima liliu tama sai ranting hodi observa direita kondisaun ranting sira prepara iha baze.
“Ha’u sente kontente tebes, ita nia prezidente KRAM ho nia ekipa tun direita mai iha baze mai halo re fiskalizasaun ba fatin treinamentu organizasaun arte marsiais nian, tan ne’e komesa ohin dader hahu husi Bebora mai to’o iha Kulu-Oan Postu Zumalai nan, buat balu ne’ebé membru sira halo ona no balu seidauk halo, mas ha’u agradese tanba prezidente KRAM fuan bo’ot nafatin hodi fo orientasaun mai organizasaun arte marsiais sira katak buat ne’ebé seidauk halo tenke kompleta ona atu nune’e aban bainrua ita governu reativa fali karik buat ne’ebé KRAM fo ne’e bele kompleta ona. nia dehan.
Entertantu Prezidente KRAM, Octavio da Conceição, husu ba membru OAM hotu labele rona no fiar ba ema hakerek lia bosok iha media sosial “facebook” katak governu taka arte marsiais, tanba governu suspende deit atividade treinamentu arte marsiais durante fulan 6 nia laran, nia mos husu ba organizasaun hotu liliu ba membru sira labele uza atributu organizasaun nian hanesan fardamentu hodi la’o ba mai iha fatin publiku.
Jornalista : Julio Salinas
Editor : Chamot Nahac
