Dili(RCCT) 02-04-25- Asesu husi Komunikadu Imprensa ba Sorumutu Konsellu Ministrus iha loron 2 fulan-abril tinan 2025, Konsellu Ministrus hala’o sorumutu iha Palásiu Governu, Dili, no aprova projetu Rezolusaun Governu, ne’ebé aprezenta husi Primeiru-Ministru, Kay Rala Xanana Gusmão, hodi prolonga tan, suspensaun ba ensinu, aprendizajen no prátika artes marsiais no taka temporáriu ba fatin no instalasaun hotu-hotu ne’ebé destinadu ba ensinu, aprendizajen no prátika artes marsiais to’o loron 31 fulan-dezembru tinan 2025.
Medida ida-ne’e fó kontinuasaun ba Rezolusaun Governu numeru 45/2023, loron 10 fulan-novembru, ne’ebé maka prolonga ona hosi Rezolusaun Governu numeru 17/2024, loron 24 fulan-abríl no numeru 60/2024, loron 7 fulan-novembru.
Razaun sira ne’ebé motiva suspensaun ba ensinu, aprendizajen no prátikas artes marsiais, no halo enserramentu ba ninia espasu sira, mantein nafatin. Medida ne’e kontinua konsidera nesesáriu hodi hametin pás sosiál ne’ebé hetan dezde fulan-novembru tinan 2023 no asegura katak, iha futuru, prátika artes marsiais akontese deit iha ámbitu desportivu, hodi promove valores dixiplina, sivizmu no formasaun umanista entre joven sira. Ida-ne’e maka sai justifikasaun hodi estende suspensaun no enserramentu temporáriu ba instalasaun sira ne’ebé relasiona ho atividade sira-ne’e.
Source : https://timor-leste.gov.tl/?p=42567&lang=tp
Ekipa RCCT
