Covalima (RCCT) 11-03-25-Governu liu husi Ministeriu Administrasaun Estatal (MAE) no Ministeriu Finansas hala’o konsulta programa sidadania ba autoridade sira iha Covalima iha ambitu prosesu planeamentu orsamental 2026.
Sorumutu ho tema konsulta sidadania ne’e involve liña ministerial sira ne’ebé konsidera estratejia mak hanesan Ministeriu Finansas, Ministeriu Administrasaun Estatal, Ministeriu Edukasaun, Ministeriu Saude, Ministeriu Obras Publika, Ministeriu Planeamentu Investimentu no Estratejiku, Ministeriu Agrikultura, Ministeriu Turismu no Ambiente, Minisetriu Solidaridade Sosial no Inkluzaun, no mos parseiru dezenvolvimentu nasional no internasional sira.
Partisipa iha konsulta sidadaun ne’ebé hala’o iha salaun administrasaun munisipiu Covalima ne’e, Sekretariu Estadu Dezenvolvimentu Lokal (SEDL), Mateus dos Santos Tallo, iha nia intervensaun hatete konsulta ida ne’e importante hodi fo asistensia no planeamentu ba orsamentu hodi responde ba nesesidade povu nian.
“Importante tebes, ministeriu sira ne’ebé estratejiku atu mai fo asistensia palneamentu no orsamentu ba ita nia servisu munisipais sira, ita hotu hatene dekretu lei numeru 84, delega kompetensia mai munisipiu ho delimitasaun orsamentu, ita hotu hatene presija servisu maka’as ho tulun husi governu sentarais para depois elabora ita nia planeamentu no orsamentu ne’ebé bele responde ba ita nia nesesidade povu nian, liliu programa ba desentralizasaun poder lokal, atu informa ba ita hotu katak prinsipiu fundamental husi konsulta sidadania ida ne’e maka ita nia povu nia lian tenke orienta ba jerasaun dezenvolvimentu nasaun nian, ida ne’e maka prinsipiu ne’ebe ita kaer” Informa Sekretariu Estadu Dezenvolvimentu Lokal (SEDL), Mateus dos Santos Tallo.
Prezidente Autoridade Munisipiu (PAM) Covalima, Miguel Armada Cardoso “Razão” hatete sorumutu ida ne’e importante tebes liliu atu rona preokupasaun husi xefe suku no parseiru dezenvolvimentu kona ba prosesu planu asaun 2026 ne’e sei rona husi entidades hotu.
“Liu husi planu Ministeriu Finansas nian hodi realiza sorumutu ida ne’ebé importante hodi rona ita bo’ot sira nia hanoin liliu ba iha lider komunitaria sira, parseiru dezenvolvimentu, joven sira, veteranu sira hodi fo ita bo’ot sira nia hanoin. Prosesu tomak planu asaun anual 2026 nian ita atu trasa karik rona mos husi ita bo’ot sira, la’os husik hela iha reuniaun ne’ebé ita sempre halo liliu reuniaun ne’ebé mai husi suku rasik, hanesan reuniaun konsellu suku, mai mos iha reuniaun ASPA, reuniaun konsellu konsultivu munisipal ita hotu involve iha laran hodi foti desizaun. Ida ne’e maka durante ne’e ita la’o, maibe ida ne’e hotu sei duak naton ba ita, seidauk to’o ba ita, tanba ne’e ,maka liu husi planu di’ak ida ne’ebé trasa husi Ministeriu Finansas hamutuk ho MAE hare kestaun ida ne’e hodi realiza sorumutu ida ne’e atu rona ita bo’ot sira nia hanoin balu hodi bele prapara no hodi halo planu asaun annual 2026 nian,” PAM Covalima informa.
Entertantu sorumutu konsulta programa sidadania ba autoridade sira ne’e hala’o iha Salaun Administrasaun Munisipiu Covalima ne’ebé abertura husi Sekretariu Estadu Dezenvolvimentu Lokal (SEDL), Mateus dos Santos Tallo, partipa husi Diretór Geral MF, PAM Covalima, Administrador Postu Administrativu na’in-7 iha Covalima, Xefe Suku na’in-30 inklui parseiru dezenvolvimentu nasional no internasional, no diretór servisu munisipal, diretór delegasaun teritorial sira iha Covalima.
Jornalista : Julio Salinas
Editor : Chamot Nahac
