Covalima (RCCT)
31-07-24-Governu Timor-Leste liu husi patrimoniu estadu fo ona kontratu ba
Kompañia rua hodi ko’a ai teka hun 2943 iha area Suai Supply Base ne’ebé Ministeriu
Petroleu no Rekursu Minarais (MRMP) liu husi Timor GAP,E.P halo ona Indiminizasaun
ba Komunidade ia na’in sira.

Koordenador
Servisu Floresta Munisipal Covalima, Domingos Gusmão hatete, Komapañia Nasional
rua ne’ebe mana iha tenderizasaun ne’e maka TIMXA GM. Lda no Bonuk. Lda, maka
agora dadaun hahu ona ko’a ai teka hirak ne’e.

“Ai-teka
ne’ebé iha area Suai Supply Base hamutuk hun 2943, ai hirak ne’e tama ona
lelaun tanba ne’e iha Komapañia rua maka mana tenderizasaun hanesan Komapañia
TIMXA GM. Lda no Komapañia Bonuk. Lda, husi nasional hotu, agora sira komesa ko’a
daudauk ona ai-teka sira ne’e iha Suku Kamanasa ne’eba, no ai sira ne’ebé ko’a
hotu ona sira lori ba rai iha Suku Suai-Loro”
dehan Koordenador Servisu Floresta Munisipal Covalima, Domingos Gusmão iha nia
knaar fatin Floresta Munisipiu Covalima Kuarta (31/07).

Koordenador
Servisu Floresta Munisipal Covalima ne’e, Governu liu husi Patrimoniu estadu halo
lelaun ba ai-teka hun 2943 ne’e ho montante osan dolar amerikanu rihun hitu
nulu resi lima, atus hitu lima nulu ($ 75,750.00).

“Total
orsamentu ba ai-teka lelaun iha Suai Supply Base hamutuk $ 75,750.00 ne’e kompañia
rua maka manan tenderizasaun ba ida ne’e, maka Kompañia TIMXA GM. Lda no Komapañia
Bonuk. Lda, husi nasional hotu ne’ebé reseitas ida ne’e tama kedas iha kofer
estadu” tenik nia.

Entertantu tuir
Koordenador Servisu Floresta Munisipal Covalima, Domingos Gusmão haktuir, dadaun
ne’e Kompañia rua ne’ebé manan iha tenderizasaun ne’e hahu ona ko’a ai teka iha
area SSB, nune’e guarda floresta iha Covalima ba hare tuir deit.

Jornalista : Julio Salinas

Editor      : Chamot
Nahac