Covalima (RCCT) 11-04-25-Governu Liu husi Ministeriu Petroliu no Rekursu Minerais (MPRM) no Timor Gap E.P halo sorumutu nivel ministerial hodi hala’o sosializasaun no konsultasaun Publiku Konaba planu identifikasaun rai no propriedade ba projetu auto estrada hahu husi Zumalai, Covalima to’o Natarbora, Manatutu.
Ministru Petroliu no Rekursu Minerais (MPRM), Francisco Monteiro, iha Nia intervensaun hatete, projetu Auto Estrada hahu husi Zumalai ba to’o Natarbora ne’e faze ida husi projetu Tasi Mane hodi dezenvolve setor Ekonomia iha Timor Leste.
“Ne’e faz parte hanaran projetu Tasi Mane, La’os projetu izoladu ida, projetu ida faz parte ba ita nia planu integradu bo’ot ida atu dezenvolve ita nia setor ekonomia em jeral, maibe dezenvolve setor Petroliu ho Minerais hodi ikus mai bele dudu buat barak, dudu dezenvolvimentu ekonomia, kriasaun kampu traballu. Maibe mos bele sai hanesan hodi bele dudu atividades ekonomia iha Petroliu nian, hodi bele hatama rendimentu ka osan barak liu tan ba ita Nia estadu” deklara Ministru Petroliu no Rekursu Minerais (MPRM), Francisco Monteiro, iha Nia intervensaun ba Komunidade Zumalai Sira
Prezidente Autoridade Munisipiu (PAM) Covalima Miguel Armada Cardoso “Razao” garantia nonu governu, kontinua halo konstrusaun ba Auto Estrada ligasaun husi Zumalai to’o Natarbora.
“Ami fiar katak governu ida ne’e nia hanoin kapas atu halo kontinuasaun ita nia Auto Estrada ne’ebé hahu husi Zumalai atu ba to’o iha Natarbora, ne’e ita agradese ho hirak ne’e hotu, ohin loron ita nia Ministru sira mai atu sosializa, desiminasaun informasaun ba ita hotu atu ita bele hatene, ita bo’ot sira rasik mai atu rona, atu hatene tuir tanba sira mai kompletu liña ministerial, mai ko’alia konaba rai, Ita sekretaria Estadu Terras iha hela atu hare, ko’alia kona ba animal Sekretaria Estadu Pekuaria iha, atu ko’alia kona ba estratejiku ita nia Ministru iha, planu kompletu ona” Armada dehan.
Enkuantu antes ne’e Ministeriu Petroliu no Rekursu Minerais (MPRM) no Timor Gap E.P konvoka ona sorumutu nivel ministerial iha loron 27 Marsu 2025, inklui diretór sira no Prezidente Autoridade Munisipal Covalima, Ainaro, Manufahi no Manatuto Konaba partisipasaun ka involvimentu ministeriu relevante sira atu forma ekipa interministerial hodi fasilita prosesa levantamentu dadus ba rai no propriedade, no ai horis populasaun nian ne’ebé afeta ba projetu Auto Estrada hahu husi Zumalai-Natarbora.
Jornalista : Julio Salinas
Editor : Chamot Nahac
