.png)
Preparasaun ne’e hahu husi rejistrasaun ba sarani sira ne’ebé atu partisipa, rejistrasaun ba transporte ne’ebé atu utiliza hodi transporta sarani sira husi suai ba Dili, oinsa organiza konsumu ba sarani sira durante aranka husi suai no hela iha Dili, no mapamentu ka hela fatin ba sarani Covalima nia partisipasaun iha Vizita sua santidade ne’e.
Molok ne’e Prezidente Autoridade Munisipiu (PAM) Covalima, Miguel Armada Cardoso (Razão), Kuarta foin lalais (10/07) informa ona ba Jornalista sira konaba Governu nasional aloka osan mai Munisipiu Covalima hamotuk dolar amerikanu rihun hat nulu ($ 40,000.00) ne’ebé sei jere ba hahan no tranposrte hodi fasilita sarani husi Munisipiu Covalima ne’ebé propoin husi nasional atu partisipa iha vizita Sua Santidade Papa Francisco mai Timor Leste kada munisipiu ida minimu ema rihun lima nulu (50.000).
“ita nia orsamentu ida ne’ebé mak ki’ik liu iha 40 mill, ida ne’e mak orsamentu ida ba iha transporte nian ba iha han nian no ba moras sira entaun osan ne’e ki’ik liu ba ita, maibe ita tenke jere halo nusa sarani Covalima mos bele partisipa iha ne’eba minimal rihun 50 mak bele ba. Alende ida ne ‘e ida moras ho ki’ik oan sira ne’e ita la haruka sira ba tanba iha ne’eba se ita sira ne’e ba hotu nee moras tanba situasaun loro manas situasaun rai rahun moras sira ne’e bele aumenta tan moras tanba ida ne’e mak ita hare ita ba mos lori kedas ita nia polisia, ho ema saude sira hodi, ho nailulik ho madre sira nune’e ba karik ita la buka tan ema seluk” PAM Covalima Miguel Armada Cardoso (Razão) Esplika, Kuarta(10/07).
PAM Covalima mos informa konaba fatin konsetradu sarani Covalima Partisipa iha Vizita Papa Francisco ne’e sei hamotuk sarani sira husi Munisipiu Aileu, Ainaro no Manufahi iha Kasnafar rai k’ladik entre Munisipiu Aileu no Dili. Durasaun tempu iha ne’eba durante loron tolu deit.
“Ita rona deit tanba planu ne’ebé mak fo ba ita , kleur liu loron tolu tanba ita husi ne’e ba ita hela iha Kasnafar depois mak iha kasnafar ne’e iha Munisipiu Manufahi, Ainaro ho Aileu hamutuk ho ita tanba ne’e mak ita hetan organiza husi PAM rasik ho estrutura, komandante Munisipiu hare kestaun ida ne’e atu nune’e ita nia komunidade sira labele la’o tuir sira nia hakarak hotu hotu tenke iha disiplina ema ne’ebé rezista nia kareta ka motor mak ba la rezista la ba” Tenik Razão.
Entretantu tuir informsaun ne’ebé Jornalista sira asesu, sarani Covalima ne’ebé atu partisipa iha Vizita Sua Santidade Mai Timor Leste ne’e sei halo rejistrasaun iha Kada Suku no Aldeia ou kapela estasaun no Igreja hahu husi loron 13 to’o loron 30 fulan Jullu 2024.
Jornalista : Moichung
