Covalima (RCCT) 26-09-23–Sekretariu Estadu Asunto Toponomia Organizasaun Urbana, Germano Santa Brites Dias, tersa feira (26/09) lokraik hala’o vizita iha Munisipiu Covalima atu habeler informasaun ba funsionariu sira konaba Lei hijene ordem publiku.

Sekretariu Estadu Asunto Toponomia Organizasaun Urbana, Germano Santa Brites Dias, hatete vizita ida ne’e atu mai fahe informasaun toponomia nian ne’ebé ligadu ho dekretu lei No. 33, tanba lei ida ne’e haree liu ba hijene ordem publiku atu nune’e ema hotu bele hatene no labele estraga jardim sira.

“Ho vizita ida ne’e atu mai fahe informasaun sobre servisu toponomia nian liga ho dekretu lei Numeru 33, atu hatete deit katak lei numeru 33 ne’e haree liu ba hijene ordem publiku, hijene ordem publiku ne’e fatin hotu-hotu ne’ebé livre ho espasu publiku ne’e ita tenke asegura kuidadu para ema hotu bele uza ho diak” informa Sekretaria Estadu ba jornalista sira iha Salaun Enkontru Administrasaun Munsipiu Covalima Tersa feira ne’e.

Nia dehan ba jardim publiku sira governu sei tau matan hodi hadi’a, maibe nudar sidadaun ba uza deit, no governu la fo espasu ba sidadaun atu harii tenda iha jardim laran.

“Jardim publiku sira ne’e governu ka estadu sei tau matan, ita nudar sidadaun iha dever atu ba uza deit, ita labele ba harii tan tenda iha laran depois halakon tiha jardim nia beleza iha ne’eba” nia dehan.

Entertantu Sekretariu Estadu Asunto Toponomia Organizasaun Urbana, Germano Santa Brites Dias, ho nia ekipa remata vizita iha Covalima no sei kontinua fahe informasaun kona servisu toponomia no dekretu lei ne’e ba iha munisipiu Bobonaro no Likisa.