Covalima (RCCT) 30-04-21 Grupu Arte Marsiais (GAM) Kera-Sakti ho Kork iha Aldeia Hatu no Lela ho inisiatíva hamos ou lere du’ut iha areadores Eskola Básika Filial (EBF) Lela nebe lokaliza Aldeia Hatu, iha Suco Holpilat Postu Administrativo Maucatar.
Wainhira dada lia ho Jornalísta RCCT reprezentante GAM rua ne’e, Rogério Gusmão via telefone informa Grupo Arte marsias rua iha Aldeia Hatu no Lela Organiza malu hodi halo limpeza iha areadores EBF iha Aldeia Hatu ne’e, tanba iha Eskola ne’e Estudante sira maioria ho idade ki’ik, no objetivou seluk, husi aktividade lipempeza ne’e mak atu bele kria amizade no Paz entre membru sira husi Kork no mos IKS nune’e bele membru sira bele horik iha paz nia laran iha komunidade nia let.
“ Ami orgaun rua hanesan Kera-Sakti ho Kork organiza malu hodi hamos areadores EBF ne’e, tanba ami hare dala ruma sira nia professor/a maka halo fali limpeza, tanba ita nia alin Estudante sira mesak ki’ik oan deit, tanba ne’e maka, ami organiza malu hodi hamos Eskola ne’e, no objetivo seluk mos katak, ami orgaun rua ne’e atu kria dame no paz iha ami nia komunidade sira nia le’et ” dehan Rogério Gusmão Via telefone ba RCCT Sexta (30-04)
Enkuanto Cordenador EBF- Lela, Augusto Gusmão informa, Estudante sira Iha EBF Lela maioria ho idade nebe sei ki’ik, tanba ne’e Estudante sira laiha kbi’it atu hamos areadores Eskola nebe luan ho du’ut nebe naruk, tanba ne’e nia sente kontente, wainhira juventude sira husi orgaun rua ne’e hamosu inisiativa hodi hamos ona areadores EBF Lela.
“Ha’u sente kontente tebes tanba Juventude sira iha inisiativa rasik hodi hamos areadores Eskola EBF Lela, tanba sira hanoin katak sira nia alin sira ne’e sei ki’ik hotu, nebe sira la iha kbi’it atu hamos areadores Eskola nian nebe luan tebes ho du’ut nebe naruk, tan ne’e ha’u agradese ba Juventude sira ” Codenador EBF ne’e dehan.
Xefe Aldeia Hatu Zacarias Gusmão mos apresia GAM Kork no Kera Sakti ne’be hatudu ona exemplo nebe di’ak ba Komunidade sira iha Aldeia Hatu no Lela, tanba ne’e nia nafatin enkoraza GAM rua ne’e iha Aldeia Hatu no Lela, ba futuru atu nafatin kria Unidade no Paz.
“ Hau hanesan Xefe Aldeia ha’u apresia tebes ho Grupo Arte Marsiais Kera Sakti ho Kork nebe maka hatudu ona exemplo nebe di’ak tebes mai ami, tanba ne’e ha’u husu nafatin atu mantein ho imi nia unidade ho Paz ida nebe mak iha ona ne’e, nune’e labele hamosu fali konflito iha komunidade sira nia le’et ” dehan Xefe Aldeia Hatu
Entertantu Aktividades halo limpeza iha areadores EBF Lela nebe lokaliza iha Aldeia Hatu ne’e hahu ona iha Loron Sabado Semana kotuk (24-04-21) no sei kontinua iha loron Sabado aban (01-05-2021).
Jornalísta : Tynho Gusmão
Editór : Chamot Nahac
