Covalima (RCCT) 28-09-23–Organizasaun Ajensia Internasional Fundasaun Ázia hamutuk Komando Polisia Nasional Timor-Leste liu husi Departamentu Polisia Komunitaria kinta ne’e fasilita formasaun konaba polisiamentu Komunitaria ba Ofisial Polisia Suku (OPS) sira iha Munisipiu Covalima.

Xefe Dapartamentu Polisia Komunitaria hanesan, portavos PNTL, Superientendente Polisia Antonio da Luz hatete formasaun ne’e nudar refresh training ba OPS atu bele hakbit koñesimentu konaba servisu ne’ebé durante ne’e sira hala’o iha terenu.

“Liu husi formasaun ida ne’e atu bele hasa’e sira nia koñesimentu konaba servisu sira ne’ebé durante ne’e sira halo ona, alende ida ne’e, ita hakarak atu hetan informasaun husi OPS sira konaba servisu ne’ebé sira halo loro loron” Informasaun Xefe Dapartamentu Polisia Komunitaria hanesan mos portavoz PNTL, Superientendente Polisia Antonio da Luz ba jornalista sira iha Salaun Igreja Ave Maria Suai Kinta (28/09).

Komandante PNTL Munisipiu Covalima Superientendente Polisia, Calisto Gonzaga haktuir formasaun ne’e importante ba OPS sira hodi reforsa servisu sira ne’ebé ligadu ho polisia komunitaria.

“Formasaun ida ne’ebé importante tebes maka atu bele fo hanoin fila fali oinsa maka ita nia official Polisia Suku hetan saida maka iha sira nia suku, tanba tuir ita nia hatene katak suku ida ho suku seluk ne’e ninia istoria diferente tebes tanba depende ba ambiente sosiedade, ita nia polisia suku hamutuk 30 ne’e bele lembra fila fali servisu balu, papel balu ne’ebé maka atu reforsa sira nia servisu balu ligadu ho servisu komunitaria nian” nia dehan.

Entertantu formasaun ne’e hala’o iha salaun Igreja Ave Maria Suai, no partisipa masimu husi Offisial Polisia Suku (OPS) hamutuk na’in 30, no formasaun ida ne’e hala’o fasilita Fundasaun Ázia no Komando Jeral PNTL liu husi Departamentu Polisia Komunitaria.