Covalima (RCCT) 24-01-25-Kompañia Join Ventur Entre Telafinosegra Unipesoal Lda no Derren Santa Unipesoal Lda, hahu ona halo servisu fornesimentu liña eletrisidade, inslatasaun foun ba liña médiu tensaun ba komunidade sira iha Diluhilin Aldeia Haemanu Suku Beko, Postu Administrativu Suai.
Xefe Unidade Eletrisidade Timor-Leste Empreza Publiku (EDTL.EP) Munisipiu Covalima, Anorito Mendonça, informa kompañia Join Ventur Telafinosegra Unipesoal Lda no Derren Santa Unipesoal Lda, hala’o obra dada liña eletrisidade husi Aldeia Holbolu to’o Diluhilin Aldeia Haemanu Suku Beko ho distansia kilometru lima (5km).
“Ha’u simu simu dadus husi ita nia autoridade lokal katak kliente ka komunidade iha Aldeia Haemanu, sub Aldeia Diluhilin, Suku Beko ne’ebé atu asesu ba liña eletrisidade hamutuk uma kain-30, agora daudaun kompañia Telafinosegra Unipesoal Lda, Join Ventur ho Derren Santa Unipesoal Lda, hahu hala’o ona servisu” informa Xefe Unidade Eeletrisidade Timor-Leste Empreza Publiku (EDTL.EP) Munisipiu Covalima, Anorito Mendonça.
Governu liu husi EDTL.EP fo durasaun tempu ba kompañia Implementador atu hala’o obra ne’e durante loron sia nulu (90) atu finaliza instalasaun liña eletrisidade ho kilo metru 5 diresaun Holbolu to’o Diluhilin.
“Parte EDTL. EP fo ona durasaun ba kompañia ne’ebé manan obra refere, durasaun tempu fulan 3 finaliza, ba obra ida ne’e sei monta ka bolu dehan disintor ka uza NCB, maibe ba kontinuasaun monta prepagu, ne’e iha faze tuir mai, alende iha Diluhilin komesa la’o ona no parte Halik mos konklui ona husi ekipa EDTL nasional no munisipiu ba aprezenta ona kompañia manan na’in ba obra ida ne’e halo markasaun ona ba iha Aldeia Halik, ba iha Biata, Suku Lour parte Zumalai hein sira mai implementa deit ona sira nia obra iha terenu” nia dehan
Enkuantu obra fornesimentu kontrusaun instalasaun foun liña médiu tensaun ba komunidade sira iha Diluhilin, Suku Beko Postu Administrativu Suai, Munisipiu Covalima ho osan dolar amerikanu rihun atus tolu nen nulu resin sia, atus nen hat nulun resin nen sentavus sia nulu resin ualu ($ 369,646.98).
Jornalista : Julio Saliñas
Editor : Chamot Nahac
