Ainaro (RCCT) 17-04-23–Jestora Asuntu Advokasia PLAN Internasional, Laura Menezes Lopes hatete, PLAN Internasional hamutuk ho parseiru lokal sira hanesan Asosiasaun Feto Munisipiu Ainaro no Fundasaun Patria (FP) fasilita formasaun ba media lokal sira hanesan radio komunidade husi Covalima, Ainaro, Manufahi, sira konaba asuntu sensivel jeneru hod bele transforma informasaun ho kualidade ba sidadaun sira.
Workshop ne’e realiza durante loron rua iha salan Administrasaun Postu Administrativu Ainaro Vila, ne’ebe partisipa husi Jornalista Media loka sira husi Munisipiu 3, Ainaro, Covalima no Manufahi inklui media partidu nian mak eziste iha Munisipiu Ainaro.
“Objetivu prinsipal husi atividade ba loron rua nian maka ami hamutuk ho parseiru lokal hanesan Asosiasaun Feto Munisipiu Ainaro ho Fundasaun Patria kolabora ho midia sira liliu radio komunidade atu bele fahe informasaun ba asuntu sensivel ba jeneru, protesaun ba labarik no mos hakbi’it abilidade atu fornese informasaun ida ne’ebé ho kualidade ba iha ita nia sidadaun hanesan edukasaun sivika no midia sira fo informasaun loloos konaba prosesu eleitoral ligadu ba iha eleisaun parlamentar 2023 nian” informa Jestora Asuntu Advokasia PLAN Internasional, Laura Menezes Lopes, ba jornalista sira hafoin fo formasaun ba jornalista sira iha salaun enkontru Administrasaun Postu Administrativu Ainaro Villa, Segunda (17/04).
Nia subliña atividade ba formasaun refere hala’o iha rejiaun 5, maka hanesan iha Dili, Baukau, Likisa nomos Ainaro, ba Munisípiu Ainaro rasik hala’o durante loron rua hahu iha segunda no remata iha Tersa, Dili hala’o tiha ona no mos iha Likisa no Baukau.
Nia haktuir iha rejiaun Ainaro rasik involve husi Radio Komunidade Kova Taroman (RCCT) Suai, Radio Komunidade Same no Radio Komunidade Turiskai, Radio Komunidade Mauloko Maubessi, Radio Komunidade Tata Mailau Ainaro, no Media online Lian Orluli Ainaro, inklui media officer partidu politiku sira iha Munisípiu Ainaro.
Nia esplika atividade ida ne’e realiza tanba hetan apoiu husi Fundasaun Patria Ainaro, hetan apoiu fundus tekniku husi PLAN Internasional inklui hetan apoiu husi doador União Europea.
Laura iha esperansa katak liu husi fahe informasaun durante loron rua espera katak maluk autor sira husi Radio Komunidade lokal no media partidu sira mos marka prezensa atu bele halo esforsu liu tan, atu nune’e fornese informasaun ho kualidade no balansu entre parte hotu ba komunidade.
Ho formasaun ne’e Radio Komunidade sira bele foti informasaun ne’ebe liga ho feto feto sira nia lian no asuntu igualidade jéneru, promove feto iha vida politika.
Nia husu radio komunidade sira atu halo esfosu liu tan hodi bele involve maluk feto sira husi setor hotu liliu hare ba vida moris loro loron nian, nune’e sira mos bele partisipa hodi fo sira nia hanoin liu husi radio komunidade, sira bele kontribui ideas di’ak iha prosesu dezenvolvimentu.
Prezidente Asosiasaun Asuntu Feto ba Dezenvimentu Munisipiu Ainaro Ana Maria Pereirra, haktuir ho formasaun ne’e media lokal sora bele halo kobertura mak adekuadu liga ho asuntu feto iha baze, liliu ba iha eleisaun parlamentar tinan ne’e.Nia afirma igualdade serteza foka ba feto no mane.
“Iha ne’e ita koalia konaba igualdade konserteza ita foka ba feto no mane, maibe ami atu fo foka liu prióridade feto no maluk difisiente sira” nia hakotu.
Entertantu formasaun durante loron rua hahu iha Segunda no remata iha tersa hetan partisipasaun husi jornalista sira husi Radio Komunidade Mauloko Maubessi ema nain 2, Radio Komunidade Cova Taroman, Suai Ema na’in 2, Radio Komunidade 1912, Same, ema na’in 2, Radio Komunidade Tata Tata Mailau Ainaro, ema nain 2, Radio Komunidade Turiskai ema nai’n 2, media online Lian Orluli Ainaro ema na’in no media officer partidu politiku sira iha Munisípiu Ainaro.
Jornalista : JS
Editor : CN
