Covalima (RCCT) 22-07-24-Polisia Unidade Patrulamentu Fornteira (UPF) Kompañia
Bravo Covalima Sabadu (20/07) dadersan kaptura sidadaun Timor-Oan, hamotuk ema
na’in 8, ema na’in 7 husi Aldeia Bora Ikun, Suku Tashilin, Postu Administrativu
Zumalai no na’in 1 seluk husi Suku Beko, Postu Administrativu Suai ne’ebé
involve iha organizasaun Persaudaraan Setia Hati Terate (PSHT) hafoin ba sa’e
sintu iha Makala NTT Indonesia liu husi dalan ilegal, no fila mai membru UPF
kaptura iha Aldeia Ai-Oan, Suku Lalawa, Postu Administrativu Tilomar, Munisipiu
Covalima. Hafoin kaptura, Polisia UPF lori kedas sidadaun hirak ne’e mai iha
Komando PNTL Munisipiu Covalima hodi halo investigasaun tuir prosesu judisiariu
nian.

Komandante PNTL
Munisipiu Covalima, Superientendente Polisia Calisto Gonzaga, hatete sidadaun
hirak ne’e ultrapasa husi Covalima ba Malaka liu husi dalan ilegal, ho
intensaun ba sa’e sintu PSHT,

“Iha
fulan Jullu purvolta iha finde semana madrugada ita kaptura ita nia sidadaun
na’in-8 kompostu husi feto-4 no mane-4 ne’ebé ultrapasa liu husi dala ilegal
sira ba iha Kabupaten Malaka, Indonezia, intesaun ema sira ne’e ba iha ne’eba
atu bele kompete hodi bele sae sabuk ka sintu PSHT nian, tanba ita hotu hatene
ita iha ne’e iha rezolusaun governu bandu hela atividade sira ne’ebé husi grupu
arte marsiais tolu hanesan KORK, IKS-PTL no PSHT rasik, nune’e sira sente katak
iha Timor ita labele sae sintu sira buka meus hodi ba sa’e sintu iha Malaka, no
fin sira ba kontra rejras barak, rekras ida maka sira liu husi dalan ilegal,
sira tama depois sira partisipa atividade sae sintu iha ne’eba depois sira fila
ne’e maka ita hetan informasaun partikular sira husi Zumalai ema na’in-7
kompostu husi feto-3, mane-4 no feto ida seluk husi Suku Beko, hamutuk sira
na’in-8 maka ita kaptura hamutuk feto na’in-4, mane na’in-4 no agora daudaun
suspeitu sira ne’e lori mai ona iha komando PNTL munisipiu Covalima hodi presta
deklarasaun” informa Komandante PNTL Munisipiu
Covalima, Superientendente Polisia Calisto Gonzaga, ba jornalista sira iha nia
k’nar fatin Komando PNTL Covalima, Sabadu (20/07).

Komandante PNTL
ne’e afirma sei prosesa sidadaun na’in-8 no Kondotor na’in ne’ebé diskunfia
fasilita membru PSHT ba sa’e sintu iha Malak NTTL Indonesia, bazeia ba
regulamentu ka instrumentu legal ne’ebé iha.

“Hein
katak ita sei halo nia prosesu ne’e bazeia ba regulamentares ka instrumentu
legais ne’ebé maka ita iha, maibe atu dehan katak ita komunika ona ho tornu
Ministeriu Publiku ne’ebé maka loron feriadu ohin hatete katak halo ninia
prosedimentu ne’e normal, ne’ebé ohin ita halo identifikasaun hotu ona no
uitoan tan ita sei konstitui TIR maibe ninia sekuensia legal ne’e nafatin iha
depois ita submete ba prosesu judisiariu, sim iha kondotor ida maka sira
komunika malu maibe kondotor ne’e rasik mos sira nia ema hotu PSHT  depois nia lori mikroleta ida ba hasoru hodi
tula sira, hafoin nia ba hasoru polisia sira preparadu ona tanba ne’e maka
inklui kondotor mai hotu iha komando hodi prosesa tuir lei ne’ebé iha” dehan
komandante.

Entertantu Polisia
Unidade Patrullamentu Fronteira Kaptura membru Organizasaun Arte Marsial na’in 8
ne’e iha aldeia Ai-Oan Suku Lalawa Postu Administrativu Tilomar, iha loron sabadu
(20/07) hale’u oras tuku 4 madrugada.

Jornalista : Julio Salinas

Editor       :
Chamor Nahac