COVALIMA (RCCT), 02-2026-Forsa Humanista Covalima (FHC) no Movimentu Humanista Zumalai (MHZ) sei realiza Tour Edukasaun Popular (TEP) durante loron tolu, iha Postu Administrativu Zumalai, Munisípiu Covalima.
Tour Edukasaun Popular (TEP) hanesan programa trimestrál husi ekipa FHC ne’ebé realiza kada fulan hodi komemora no fó onra ba loron nasionál sira ne’ebé eziste iha kalendáriu nasionál Timor-Leste, no kontinua hanoin no fó onra ba erói sira nia sakrifísiu iha prosesu luta ba libertasaun pátria.
Representante Prezidente Forsa Humanista Covalima, Agustinho Amaral, informa katak objetivu husi atividade Tour Edukasaun Popular mak atu lori edukasaun besik no hanesan ba ema hotu, laiha diskriminasaun no diferensa klase, no mós atu apoia esforsu Governu hodi aselera dezenvolvimentu edukasaun iha Timor-Leste, tuir Konstituisaun Repúblika Demokrátika Timor-Leste (K-RDTL), Artigu 59.
“Ita husi Forsa Humanista Covalima (FHC) no Movimentu Humanista Zumalai (MHZ) hakarak hatete katak objetivu husi Tour Edukasaun Popular ne’e mak oinsá atu lori edukasaun besik no hanesan ba ema hotu, sem diskriminasaun no klase, tanba komunidade mak nain lolos ba edukasaun. Iha sorin seluk, atividade ne’e mós atu apoia ita nia Governu, liu-liu Ministériu Edukasaun, hodi bele aselera dezenvolvimentu edukasaun iha Timor-Leste tuir Konstituisaun RDTL Artigu 59,” informa Agustinho Amaral.
Nia hatutan katak ekipa Forsa Humanista Covalima no Movimentu Humanista Zumalai sei hala’o Tour Edukasaun Popular durante loron tolu, hahú husi 5 to’o 7 Setembru 2026, hodi komemora tragédia violasaun direitus umanus ocorrida iha 7 Setembru 1999, iha Suku Lour, Postu Administrativu Zumalai, Munisípiu Covalima.
“Programa Tour Edukasaun Popular ne’e ita husi ekipa Forsa Humanista Covalima (FHC) no Movimentu Humanista Zumalai (MHZ) deside atu realiza durante loron tolu, hahú husi loron 5 to’o loron 7 fulan Setembru tinan ne’e, hodi komemora loron tragédia violasaun direitus umanus 7 Setembru 1999 hamutuk ho ita nia komunidade iha Suku Lour, Postu Administrativu Zumalai, Munisípiu Covalima, hodi hanoin hikas ita nia erói sira ne’ebé fó an no sakrifika sira-nia moris hodi liberta rai ida ne’e,” nia hatutan.
Iha programa Tour Edukasaun Popular durante loron tolu ne’e, organizadór sira sei hala’o atividade oioin, inklui preparasaun foinsa’e ba dansa kultura, apresentasaun poezia, desfile farda kultura, kalan refleksaun, teatru, animasaun no atividade edukativu sira seluk.
Atividade ne’e espera atu sai hanesan espasu edukativu no reflexaun ba komunidade, liu-liu ba jerasaun foun, atu komprende liután kona-ba istória, sakrifísiu no luta povu Timor-Leste ba independénsia.
Jornalista: Julião Correia
Editor: Paul Mandeu
