Covalima (RCCT), 30 Setembru 2026 — Forsa Humanista Covalima (FHC) hahú formasaun gratuita ba foin-sa’e sira iha Munisípiu Covalima, ho matéria Ko’alia iha Públiku (Public Speaking), Lideransa no Lian Inglés Báziku. Formasaun ne’e sei hala’o durante fulan tolu.
Formasaun ne’e objetivu atu dezenvolve koñesimentu no kapasidade foin-sa’e sira, liuliu iha área ko’alia iha públiku, lideransa no Lian Inglés, hodi hasa’e sira-nia konfiansa-an no kapasidade atu partisipa no lidera iha komunidade.
Reprezentante Prezidente FHC, Agustinho Amaral, hateten ba jornalista Radio Comunidade Cova Taroman (RCCT) katak FHC hanesan ekipa ne’ebé eziste ho prinsipiu voluntarismu hahú husi tinan 2018.
“Forsa Humanista Covalima (FHC), hanesan ita hotu hatene, katak ekipa eziste ho prinsipiu voluntáriu hahú husi 2018 mai. Tanba ne’e, ho prinsipiu ne’ebé ekipa iha ohin, ita deside hahú fó formasaun ba maluk foin-sa’e sira ne’ebé iha inisiativa mai aprende hamutuk ho ekipa. Iha formasaun ne’ebé ekipa loke ba foin-sa’e sira mak hanesan Public Speaking, Lideransa no Lian Inglés Báziku,” nia hateten.
Nia hatutan katak formasaun Public Speaking, Lideransa no Lian Inglés Báziku sei hala’o durante fulan tolu, ho espírito voluntarismu, no loke gratuitamente ba foin-sa’e sira.
“Formasaun Public Speaking, Lideransa no Lian Inglés Báziku ne’e, durasaun fulan tolu, ho espírito voluntarismu. Formasaun hirak ne’e ita loke gratuitamente ba foin-sa’e sira, signifika katak rejistu gratuita, tuir formasaun gratuita to’o hetan sertifikadu mos gratuita, tanba ran ida halo ona juramentu ba rai doben Timor ida ne’e katak ami nia salariu mak jerasaun foun nia destinu,” nia hatutan.
Formasaun hirak ne’e nu’udar parte husi inisiativa FHC atu fó oportunidade ba foin-sa’e sira hodi dezenvolve koñesimentu, kapasidade no espírito lideransa liuhusi aprendizajen no servisu voluntáriu.
Jornalista: Julião Correia
Editor: Paul Mandeu
