COVALIMA (RCCT)-01-12-23—Reprezentante feto iha Munisipiu Covalima sente triste tanba haree ba uma feto Covalima (Gedung Wanita) naran komesa lakon no uma refere oras ne’e nakfilak ona ba uma taru fatin.
Feto Potensia Munisipiu Covalima Amelia de Jesus Amaral, hateten uma ne’ebé Nia naran reprezenta feto Covalima oras ne’e naran komesa lakon, tan ne’e husu ba Prezidente Assosiasaun Halibur Feto Covalima atu halo advokasia konaba Uma Feto Covalima (Gedung Wanita ).
“Ita la’o ba mai liu husi ne’eba hare deit fatin, ita triste bainhira ita hatete Gedung Wanita, maibe ha’u la hatene feto barak sei hatene gedung wanita ka lae, tanba iha okupasaun Indonezia bolu naran Gedung Wanita, tempu ita ukun-an mos bolu gedung wanita, maibe husi fali tinan 2022-2023 feto barak ladun hatene ona konaba naran gedung wanita, tan ne’e husu ba Prezidente Assosiasaun Halibur Feto Covalima atu organiza malu nafatin oinsa atu halo advokasia ba uma ida ne’e” Feto Pontensia, Amelia de Jesus Amaral dehan lia ne’e wainhira halo intervensaun iha Selebrasaun kampaña loron 16 ativismu kontra violensia hasoru feto no labarik feto ne’ebé hala’o iha Centru Comunidade Covalima Sesta (01/12).
Iha fatin hanesan, Sekretariu Konsellu Munisipal Kombatentes Libertasaun Nasional Munisipiu Covalima, Joaquim Barros, dehan uma feto ka gedung wanita ora ne’e nakfilak ona ba uma taru fatin, maibe iha okupasaun Indonezia inisiu atu hahu prosesu rotasaun halo paktu unidade entre orgaun rua hanesan pro kemerdekaan no pro otonomia halo asina paktu unidade nasional iha uma ne’e duni, tan ne’e Konsellu veteranus hanesan na’in ba veteranus iha Covalima halo karta impedimentu ida no maluk balu mai apoiu atu halo asaun pasifiku.
“Agora dauduan ami nia karta sei iha ho razaun tanba gedung wanita ka uma feto Covalima ne’e hanesan fatin istoriku ida kuandu atu hahu inisiu tama ba prosesu rotasaun asina paktu unidade ida entre orgaun rua, pro kemerdekaan ho pro otonomia halo asina paktu unidade nasional ida iha uma ne’e duni momentu ne’eba, tanba ne’e maka ho razaun ida ne’e konsellu veteranus hanesan na’in ba veteranus hotu maka halo karta impedimentu ida, durante ami halo impedimentu estrutura barak maka konsulta no balu mai mai iha edifisiu konsellu veteranus halo konsulta atu halo asaun pasifiku, maibe ha’u rasik maka halo alterasaun hapara tiha sira nia emosaun sira ne’ebé hakarak halo asaun pasifiku tanba la’os ona tempu ita uza maneira sira hanesan ne’e maibe tuir lei, karik nakfilak ona la’os uma feto maibe ita hari fila fali uma jogador ida iha ita nia kapital munisipiu liliu konsentra besik liu iha edifisiu edukasaun Covalima, residensia administrador nia oin, edifisiu PNTL Covalima nia oin no iha eskola primaria nia oin no komunidade nia” infroma Sekretariu Konsellu Munisipal Kombatentes Libertasaun Nasional Munisipiu Covalima, Joaquim Barros.
Nune’e mos Prezidente Assosiasaun Halibur Feto Covalima, Maria Fatima, deklara molok nalfilak ba fatin taru, edifisiu Gedung wanita, Administrasaun Munisipiu Covalima liu husi Afonso Noguiera Nahak nudar administrador Munisipiu iha tempu ne’eba entrega Uma gedung Wanita ba assosiasaun Feto Covalima atu bele utiliza.
“Iha momentu ami husi assosiasaun feto Covalima ba halo advokasia ho Munisipiu Covalima sesante Afonso Noquiera Nahak ami foti asuntu kona ba uma feto ka gedung wanita, iha ne’eba Sr. Afonso oferese duni uma ne’e mai iha assosiasaun katak ba futuru imi mak sei uza uma ne’e ba tuir nesesariu feto Covalima nian ne’ebe iha, asuntu ne’ebe ami halo ho estrutura assosiasaun feto halo mos advokasia lubuk ida ho sektor sira hotu iha Covalima ita halo maibe tanba mudansa politika ita hatene mudansa ba dezenvolvimenttu derepente deit desizaun husi nasional mai iha kraik dala ruma ne’e desizaun nivel altu sira nian ita labele halo buat ida derepente ita haree sasan sira mosu ona hanesan ne’e, maibe esforsu lubuk ida maka ita koko, maibe hanesan assosiasaun feto munisipiu Covalima sei halo advokasia ba futuru ita bele husu fatin oinsa maka sira husi parte administrasaun nian bele prepara no fo fatin ba oha feto sira hodi troka fali uma gedun wanita ne’e seluk karik iha bele hatudu mai assosiasaun feto Covalima” nia informa.
Entertantu gedung wanita ka uma feto Covalima ne’e sai mos fatin istoriku ida ba luta ukun rasik an, tanba iha momentu okupasaun Indonezia nian, luta na’in sira iha Covalima halo asina paktu unidade nasional ida entre pro kemerdekaan ho pro otonomia, maibe iha era ukun an, uma refere entrega mai iha assosasaun feto Covalima hodi tau naran Uma Feto Covalima, maibe tama iha tinan 2022-2023 uma refere la’os ona uma feto Covalima maibe nakfilak fali ba uma taru kasino fatin.
Editor : Chamot Nahac
