Covalima (RCCT) 20-02-25-Hafoin kumpri mandadu husi Tribunal Distrital Suai ho numeru Uniku Krimunal 0037/25/PNSIK halo buska no aprensaun domisiliariu patrimonia ba Komisariu Konsellu Kombatente Libertasaun Nasional (CCLN) rejiaun 4 ho naran inisial FDS nia uma, ne’ebe Diskunfia halo kobransa ilegal hodi fasilita rejistu veteran falsu tinan 2009.
Fora husi ne’e Polísia Nasionál Timor-Leste (PNTL) Departamentu Investigasaun Kriminál Nasionál (DIKN), identifika bala musan 246 no karegador lima iha FDS nia rezidensia iha Suku Debos,Postu Administrativu Suai, Munisipiu Covalima.
Xefe Departamentu Investigasaun Kriminal Nasionál (DIKN), Superintendente Polisia, João Belo dos Reis, hateten liu operasaun buska aprensaun identifika ba pesoal Polisia ho diviza ajente xefe inisial FDS ne’ebé laiha ordem husi PNTL atu asegura magasen no munisions ne’e iha nia uma.
“Objetu seluk maka ligasaun ba kilat musan no agora parte ida ne’e ami sei aprezenta ba komando jeral hodi foti medidas tuir mai, ida ne’e konsidera violasaun ba regras internal ami nian, ne’ebé liga mos ba lei krime mos la bele, maibe buat rua ne’e sei submete hotu kedas ba regulamentu disiplinar no krime, kilat musan ho magasen ne’ebé ita hetan ne’e ligasaun ho PNTL nian” informa Xefe Departamentu Investigasaun Kriminal Nasional (DIKN), Superientendente Polisia Joāo Belo dos Reis, ba jornalista sira iha komando PNTL Munisipiu Covalima, Kuarta (19/02).
FDS hanesan Membru Polisia ativu iha Eskuadru Polisia Suai Maibe hetan lisensa la ho vensimentu iha tinan 2015 tanba assume hela kargu nudar Komisariu CCLN munisípiu Covalima. Nune’e mak Evidensia hanesan bala musan no karegador lima ne’e, parte investigasaun sei aprezenta ba komandu Jeral PNTL hodi foti medida konaba utiliza armas tanba konsidera viola regra internal PNTL.
“Nia hetan lisensamentu seim vensimentu hahu kedas iha tinan 2015 liu ba, agora konsidera membru ativu PNTL, maibe ho evidensia hirak ne’ebé ami hetan iha FDS nia uma ami relata hotu ona, no agora hein orientasaun husi komando saida maka ami atu halo, evidensia ka objetu hotu ne’ebé maka ita rekolla iha FDS nia uma valida hotu agora sei aprezenta ba iha Ministeriu Publiku Suai” nia informa.
Superintendente Polisia, João Belo dos Reis dehan tan, tu’ir regulamentu PNTL nian Lisensa ho ho vensimentu vale to’o tinan tolu, depois halo renova, maibe FDS ninia lisensa la ho vensismentu renova ikus iha tinan 2018, maibe depois ne’e seidauk iha halo renovasaun to’o agora, ho nune’e mak sei halo prosesu tuir lei Disiplinar PNTL nian ba FDS.
Engkuantu Evidensia konaba rai bala musan ho karegador iha rezidensia, daudaun ne’e parte investigasaun rejista ona hodi aprezenta relatóriu ba komandu jeral PNTL hodi kontinua prosesu ba Ministeriu Publiku bainhira iha ligasaun ho krime.
Jornalista : Julio Salinas
Editor : Chamot Nahac
