COVALIMA (RCCT) 04-04-25 Parseiru Dezenvolvimentu Food and Agriculture Organization (FAO) Hamutuk ho Autoridade hala’o Eventu Aprendizajem Ho To’os Nain Sira Liu Husi Atividade Rolling Lehe hodi halo Pratika konservasaun ba rai iha Suku Beko Aldeia Bibi Atan Postu Administrativu Suai, Munisipiu Covalima. Programa Konservasaun Agrikultura ne’e Hetan Apoiu Fundus husi Povu Amerikanu no Implementa husi Parseiru Dezenvolvimentu FAO hamotuk Ministeriu Agrikultura atu hodi hamate dut no Habokur Rai,hadi’a estrutura Rai No Hasa’e Produtividade Produsaun.
Tanba ne’e Sekretariu Munisipiu Asuntu Organizasayun Komunitariu, Filomeno Cardoso, husu ba Agrikultor sira atu hakiak Lehe iha ida idak nia nia to’os Konserva no Habokur Rain ne’ebé sira utiliza.
“Konservasaun agrikultura ne’e fator ida importante tebes, apoiu husi ita nia ajensia dezenvolvimentu husi FAO. Lehe ne’ebé mak ita iha ne’e ita hare di’ak tebes halo mudansa ita nia to’os na’in sira tanba ita nia to’os nain sira uluk aplika buat ida halo to’os ho modelu tradisional maibe agora ita hare mais abansa itoan tanba ita nia to’os na’in sira la gasta ona sira nia enerjia lori hamos du’ut ne’ebé iha to’os laran.” Filomeno Cardoso Hatene.
Reprezentantr Diretór Servisu Munisipal Agrikultura Covalima, Angela Soares Barros husu ba inan aman sira ne’ebé halo to’os atu kuda Lehe no mos konserva rai hodi hasa’e produsaun agrikultura.
“Tanba ita kuda ita mak senti, isin ita mak fa’an ita mak ba ema seluk, husu ita bo’ot sira nia rai iha ne’e abandona barak karik halo favor ita bo’ot sira uza hodi kuda lehe, kuda Lehe ne’e hodi konservasaun agrikola” Angela Soares Barros, enkoraza.
Sorin seluk to’os na’in Julião de Araujo senti kontenti ho fini Lehe ne’ebé FAO oferese hodi konserva ninia to’os halo rai sai matak liu tan hodi fo produtu ne’ebé di’ak.
“Ha’u kuda Lehe ne’e tanba ninia rezultadu ne’e di’ak, bele rai ne’e maten, batar la iha mais ita kuda Lehe ona nia fo hasil ne’e ita mos puas tanba ninia fulin ne’e rata rata, depois fulin mos bo’ot, ha’u seidauk hakiak Lehe, kuda batar ida rai maten ne’e nia fulin la iha no iha rai isin itoan ne’e mak nia fulin iha deit, ne’eresultadu la dun di’ak ho ita nia hakarak to’o kuda lehe mak foin ami mos senti ho resultadu” To’os na’in Julião de Araujo, fo sasin.
Entretantu atividade rolling Lehe ne’ebé hala’o iha Aldeia Bibi Atan Suku Beko ne’e, ho medida to’os, kuaze hektare ida resin, maibe komunidade seluk mos hahu hakiak ona Lehe iha sira nia to’os, tanba sira konsidera ne’e importantefo benefisiu ba komunidade agrikultor sira rasik .
Jornalista : Alfredo Barreto
Editor : Chamot Nahac
