Covalima (RCCT) 06-05-25-Ajensia Internasional Food and Agriculture Organization (FAO) hala’o Kapasita ba Extensionista na’in 30 no Funsionariu Agrikultura sira iha Covalima Konaba Risku Dezastre Naturais, liu liu konaba Sistema alerta sedu,Asaun atisipatoriu, Adaptasaun ba mudansa klimatika ne’ebé mak di’ak liu no mos Jestaun ba dezastre naturais.
Senior Jestaun Risku Dezastre no Mudansa Klimatika husi FAO Iha Timor Leste, Demetrio Amaral Carmo esplika atividade kapasitasaun ba funsionariu Agrikultura no Extensionista ne’e atu eleva sira nia kuñesimentu hodi halo prevensaun no redus dezastre ne’ebé akontese hasoru produsaun ne’ebé komunidade Agrikultura sira produs husi to’os laran.
“treinamentu ida ne’e nia enfase ba iha nia tema hat, ida primeiru mak jestaun risku desastre no ida segundu mak asaun antispatorio iha jestaun risku sira ida tersiru mak oinsa halo adaptasaun ba mudansas klimatika ne’ebé di’ak liu no tema ida ikus liu mak utilidade tablet ba hametin sistema alerta sedu no desamina informasaun ba to’os na’in sira husi tema hat ne’e ita hare katak alvu principal maka extesionista sira tanba extensionista mak front line ka primeira liña iha ministeriu agrikultura iha produsaun alimantar no sira mak autor primeira, liña ne’ebé primeira.” Senior Jestaun Risku Dezastre no Mudansa Klimatika husi FAO Iha Timor Leste, Demetrio Amaral Carmo esplika.
Sorin seluk Sekretariu Munisipal Asuntu Sosial no Organizasaun Komunitaria, Munisipiu Covailma, Filomeno Cardoso, konsidera funsionariu agrikultura no extensionista mak autor prinsipal ba seitor agrikultura hodi dezenvolve no promove area agrikultura ne’ebé di’ak liu iha futuru basa Covalima iha potensia bo’ot iha setor agrikultura
“Treinamentu ne’ebé mak ita sira tuir ne’e sei sai hanesan modalidade ida hodi kapasita ita bot sira oinsa ita hirak ne’e hamututk hodi halo prevensaun metigasaun hodi hasoru risku dezastre iha ita nia Munisipiu Covalima, alende ne’e mos ita sai hanesan area potensialidade ba ita nia area agrikultura nian no ita mos halo treinamentu ba extesionista sira liliu ba autorizasaun tabelta ninian hodi nune’e ita bele halo susesu programa ba future, liliu ba ita nia area target sira no ba suku alvu, ita nia agrikultor sira bele hetan rezultadu kolleta ida ne’ebé mak di’ak” seluk Sekretariu Munisipal Asuntu Sosial no Organizasaun Komunitaria, Munisipiu Covailma, Filomeno Cardoso, dehan .
Iha okaziaun ne’e, Diretór Servisu Munisipal Agrikultura Munisipiu Covalima, Lino Magno husu ba extensionista sira enkoraza Funsionariu no Extensionista sira ne’ebé partisipa iha formasaun ne’e atu intende didi’ak ho seriu nune’e bele aplika matenek ne’ebé hetan hodi atende komunidade sira iha terrenu.
“Husu ba ita bo’ot sira ne’ebé mak ohin loron tuir treinamentu, hare didi’ak ho disiplina para komprende didi’ak saida mak tekniku sira fo ba imi, halo tuir no komprende tanba treinamentu ida ne’e ninia objetivu atu uza tablet ne’ebé atu hatama ba Sistema. Nune’e relatoriu ba oin ne’e ita hotu hotu atu uza sistema ida ne’e, ho ida ne’e mak FAO hanesan ajensia internasional ida servisu hamutuk ministeriu agrikultura hodi halo programa ida ne’e no prepara sasan sira ne’e” Lino Magno dehan.
Formasaun ba funsionariu agrikultura no extensionista sira ne’e hala’o durante loron lima, hahu Segunda Feira no sei remata iha sexta semana ne’e, Portantu aktividade ne’e hala’o iha salaun CNE Covalima, ne’ebé Lokaliza iha Tabakolok Suku Debos, Postu Administativu Suai.
Jornalista : Alfredo Barreto
Editor : Chamot Nahac
