COVALIMA—-Xefe Suku Debos, Agustinho da Silva, hateten durante loron 11 nia laran pagamentu subsidiu $ 200 ba benefisariu iha Suku Debos la’o dia, maibe ih problema balu ne’ebe hasoru maka iha familia uma kain-42 maka laiha direitu hodi hetan subsidiu $ 200 ne’e tanba naran iha lista pagamentu laiha, maibe antes ne’e naran submete hotu ba iha nasionàl bainhira lista pagamentu ne’e mai hodi hala’o pagamentu haree Familia balu mak naran laiha.
“Hau nia haree no hatene iha Familia Uma Kain-42 maka naran laiha lista ba pagamentu subsidiu $ 200, antes ne’e naran hau hauruka ba hotu iha nasional, maibe bainhira to’o pagamentu ne’e la’o sira na’in-42 ne’e naran laiha fali” deklara Xefe Suku Debos Agustinho da Silva ba jornalista sira iha nia kna’ar fatin Sede Suku Debos, Tersa (10/01).
Nia dehan, familia um kain-42 ne’e maioria komunidade baibain laos funsionáriu, uluk sira nia naran iha hodi simu osan Covid-19 no simu sesta bazika nian, maibe agora ba subsidiu $ 200 sira nia naran laiha ne’e situan, depois iha sira foun balu naran haruka ba hotu ikus lista ne’e mai fali naran la mosu iha lista pagamentu subsidiu $ 200 ne’e.
Xefe suku deklara katak ih momentu ne’e kedas bainhira familia uma kain-42 ne’e naran iha lista laiha, nudar lider komunitaria hato’o kedas ba iha administrador postu administrativu Suai hodi tun kedas mai iha Sede suku Debos no mos halo reklamasaun ka rekomendasaun ba iha postu no hato’o ba iha munisipiu maibe to’o ohin loron sei dauk rezultadu.
Nia dehan sira ne’ebe naran tuan ikus mai naran la mosu fali iha pagamentu subsidiu no sira ne’ebe foun naran haruka ba hotu ikus mai naran laiha ne’e rekomenda hotu kedas ba iha postu no munisipiu.
Xefe suku hatete total benefisariu iha Suku Debos hamutuk uma kain 2.157, agora ba sira hirak ne’ebe la kohi simu subsidiu $ 200 ne’e hamutuk 171, ho razaun sira lakohi foti osan subsidiu $ 200 ho razaun tanba balu asume kargu hanesan diretor ne’ebe salariu $ 500 ba leten no balu polisia.
Nia dehan husi total benefisariu 2.157 iha suku Debos ho nia totalidade orsamentu montante hamutuk $ 400.000.00 resin, maibe ho sira hirak ne’ebe lakohi simu ne’e hamutuk familia 171 ne’e sira nia osan haruka fila fali ba iha cover estadu ho montante hamutuk $ 34.200.00, husi ema na’in-171 ne’e maioria funsionariu ho salariu $ 500 ba leten, maibe sira ne’ebe salariu $ 500 mai kraik ne’e simu hotu kedas.(Azu)
