Covalima (RCCT) 31-05-24-Relasiona ho akontese udan bo’ot iha kinta loro kraik kuaze oras 3 resin, halo korente bee maka’as hodi tama tama komunidade uma lori hotu sasan dapur no ai han inklui animal.
Diretor Servisu Munisipál Protesaun Sivil no Jestaun Dezastre Naturais Munisipiu Covalima, João Martins relata, ekipa halibur ona dadus vitima Inundasaun iha Suku Tashilin no Suku Lour ne’ebe konsege rejista Uma Kain 105.
“Ohin ami ekipa Servisu Munisipál Protesaun Sivil no Jestaun Dezastre Naturais, Autoridade Protesaun Sivíl (APC sigla Portugés) no mos parte Servisu Munisipál Obras Públika tun ba iha terenu hodi hetan dadus iha ne’eba hahu husi Suku Tashilin kompostu husi Aldeia Basana vitima kain-12, Aldeia Bora Ikun uma kain-66, Aldeia Galitas uma kain-18, iha fali Suku Lour hamutuk uma kain-9, total husi Suku 2 refere iha Postu Administrativu Zumalai hamutuk uma kain-105 ne’ebe afeta ba dezastre inundasaun” relata Diretor Servisu Munisipál Protesaun Sivil no Jestaun Dezastre Naturais Munisipiu Covalima, João Martins ba RCCT iha nia knar fatin Bairro Kostabl, Sesta (31/05).
João Martins komprometa informa,segunda Semana oin sei distribui apoiu emerjensia ba vitima Inundasaun iha suku rua refere.
“Konaba apoiu emerjensia ami priense hela formatu ba vitima dezastre sira, ne’ebe segunda feira ami bele apoiu ona emejensia food item no non food item ba vitima sira ne’ebe sasan hetan estragus kauza husi inundasaun” nia dehan.
Entertantu tuir refere haktuir Diretor Servisu Munisipál Protesaun Sivil no Jestaun Dezastre Naturais Munisipiu Covalima, João Martins informa konaba sasan komunidade nian ne’ebe hetan estragus maka hanesan sanan, bikan, inklui ai han hanesan hare ho batar ne’ebe tau iha bidong bee lori no estragus hotu, depois animal hanesan manu sira ne’e Mota lori hotu.
Jornalista : Julio Salinas
Editor : Chamot Nahac
