COVALIMA (RCCT) 06-12-23—Komandu Polisia Nasional Timor-Leste (PNTL) Munisipiu Covalima tempu badak sei halo pasa revista iha loja no merkadoria liu liu negosiante sira ne’ebé fa’an subar fugete iha area juridiku Covalima.
Komandante PNTL Munsipiu Covalima Superientendente Polisia Calisto Gonzaga informa komandu munisipiu sei tun ba iha terenu hodi halo pasa revista ba loja no merkadoria sira inklui ba iha komunidade nia let buka ema sira ne’ebé fa’an subar fugete ka petasan tanba governu bandu labele sunu.
“Ita sei halo operasaun, pasa revista la’os iha kapital munisipiu deit maibe sei tun ba to’o iha postu no suku inklui loja sira hotu, ita fo ona informasaun ba ita nia loja sira hotu, iha semana ikus husi Novembru ha’u konvida sira fo hatene ita sei bolu tan hodi fo hatene, ita sei kontinua pasa revista ba iha loja fatin hotu-hotu ne’ebé maka fatin komersial, laiha ema ida ne’ebé maka atu simu, atu fa’an, atu distribui, atu hola fugete ka petasan sira ne’e iha ita nia area kontrolu munisipiu Covalima, liu husi deskamiñu postu entrada Mota Masin, liu husi elisitu fronteira sira ne’e mos ita la tolera to’o mai iha merkadu, to’o mai iha loja ka kios sira ne’e ita la tolera atu fa’an tanba ita nia estadu ne’e bandu ona labele halo tarutu fugete” informa Komandante Polisia Nasional Timor-Leste (PNTL) Munisipiu Covalima, Superientendente Polisia Calisto Gonzaga ba RCCT iha nia k’nar Fatin Komando PNTL Munisipiu Covalima Kuarta (06/12/23).
Superientendente Polisia Calisto Gonzaga mos haktuir nia konaba nia observasaun durante komunidade nia oan sira iha kalan sunu Fugete, tan ne’e komandu tenta buka tuir halo identifikasaun ba ema sira ne’ebé fa’an fugete ne’e.
“Ita tenta hela para atu identifika ema sira ne’e, nia hola iha ne’ebé, ema ida ne’ebé fa’an ne’e nia kuidadu liliu ba kolega sira ne’ebé atraves hola ilisitu negosiu ilegal, ha’u fiar katak imi rona ha’u nia lian lalika abuza, kumpri hela regras balu ne’ebé maka ita hato’o ba, regras estadu nian, di’ak ba ita, di’ak ba ita nia povu ne’ebé, lalika halo maneiras, depois ita bo’ot sira kontra regulamentu ne’ebé mak iha” Komandante munisipiu ne’e esplika.
Entertantu komandante Munisipiu Covalima ne’e alerta atu sidadaun hotu tenki kumpri regra ne’ebé estadu fo sain, tanba saida estadu hakarak ne’e, di’ak ba povu no nasaun, atu la husi liu let, maka Komandante PNTL Covalima, Superientendente Polisia Calisto Gonzaga, husu sidadaun hotu labele fana fugete ka petasan subar no husu ba sidadaun hotu labele abuza no kontra regras husi estadu.
Julio Salinas nia Reportajen
