Covalima (RCCT) 21-06-24-Estudante hamotuk ema na’in 382 iha Eskola Sekundaria Publiku Jerasa Suai, Klase paralela Salele infrenta menus kadeira no meja hodi fasilita sira iha prosesu aprendijazem.

Tanba estudante sira tenki lori kadeira husi uma mai eskola hodi fasilita sira tuir prosesu apredijazem.

“Problema ne’ebé ita infrenta daudauk maka menus kadeira ho meza tanba ne’e maka ita fo hatene hela ba estudante sira halo kontribuisaun kadeira para oinsa sira bele asesu prosesu aprendisazem ne’e la’o ho di’ak, ho ida ne’e la’os to’o de’it iha ne’e maibe ita husi eskola nafatin esforsu buka hela informasaun oinsa halo pedidu ba ita nia doador sira atu bele tau netik matan ba eskola ida ne’e liliu hanesan menus kadeira ho meja para fasilita estudante sira hodi tuir prosesu aprendisazem ho di’ak, konaba kontribuisaun kadeira antes ne’e ita halo uluk enkontru ho estudante sira nia inan ho aman, depois iha momentu ne’e ita halo konkordansia ho inan aman rasik ne’ebé inan aman sira mos prontu sira kontribui atu kada estudante ida atu kontribui kadeira ida para sira na’in rasik maka uza hodi tur tuir prosesu aprendisazem” dehan Asistente Teknika Administrativa Klasse Paralela Salele João Maia.

Sikun seluk Diretór Eskola Sekundaria Jeral Publika Suai, Fernando Fereirra rekuñese estudante sira iha klasse Paralela Salele lori duni kadeira husi uma mai eskola tanba laiha kadeira ho meja.

“Sim ida ne’e loos estudante sira balu na’in lori kadeira husi uma mai eskola, tanba inan aman maka iha inisiativa rasik tanba iha ne’eba kadeira sei dauk to’o, maibe iha tempu besik Ministeriu Edukasaun sei responde ba kadeira ho meza sira, no mos ba Rotary Dili ho Rotary Lafaek sira mos hanoin hela atu siporta kadeira ho meja iha klasse Paralela Salele” nia informa.

Iha klase Paralela Salele total profesor hamutuk ema na’in-26 inklui cleaner na’in ida ho guarda eskola na’in ida, profesor kontratadu ne’ebé inan aman sira maka na’in hasai osan hodi selu hamutuk iha ema na’in-16 inklui guarda ho clinear ne’e, profesor permanente hamutuk ema na’in-9 inklui destakadu na’in ida husi ensino baziku, ho total estudante hamutuk ema na’in-382.

Jornalista : Julio Salinas

Editor       : Chamot Nahac