COVALIMA—–Hafoin akontesementu udan bo’ot iha Loron 5 Fulan Janeiro 2023 halo rai halai hodi rezulta estrada iha Postu Administrativu Fatumea kuaze metru 20 resin hetan estragus total hodi difikulta komunidade utiliza transporte publiku halo viazem husi Postu Administrativu Fatumea ba Postu Administrativu Fohorem liga mos ba kapital Munisípiu Covalima.
Rai hala’i hodi estraga estrada publiku, iha Suku Fatumea, estraga mos komunidade nia to’os kuaze metru 10 resin ne’ebe nakonu ai horis hanesN maek iha ne’eba.
Tanba ne’e Klibur Estudante Juventude Fatumea (KEJUFAT) liu husi ninia Ekipa kria sorumutuk internal ho organizaun Suku Fatumea ne’ebé ho naran Unidade Estudante no Intelektual Suku Fatumea (UNEISFAT) hodi halo diskusaun kona-ba akontesimentu rai halai iha Suku Fatumea, Aldeia Fatumea, no disidi hato’o pedido emerjensia ba Ministro Obras Publiku (MOP) no Institutu Jestaun Ekipamentu (IGE-Sigla Portuguesa) iha loron 10 Janeiru no hetan despaixu husi Ministériu Obras Publiku (MOP) Abel Pires da Silva iha loron 12 Fulan Janeiro 2023.
Portavoz KEJUFAT Rui de Fatima Amaral hateten hafoin hetan tiha despaizu husi MOP Prezidente IGE sei Pendente hodi tarde ezekuta despaixu ne’e.
“Iha ami nia karta ne’e Ministru hatun ona dezpaixu ba prezidente IGE iha loron 12 liu ba, maibe ate agora Prezidente IGE budu hela iha nia fatin ne’eba,” Rui de Fatima Amaral, deklara ba jornalista sira Via Telefone Tersa (24/01)
Rui afirma konteudu husi karta ne’e ami husu atu halo normalizasaun urjente ba estrada iha Aldeia Fatumea, Suku Fatumea Postu Administrativu Fatumea Munisipiu Covalima, pedidu ne’e ami hatama iha dia 10 janeiru no ministru hatun despaixu iha dia 12 fulan janeiru ne’e” Tenik
Porta Voz KEJUFAT haktuir, hafoin hetan despaixu husi Ministru, Prezidente IGE sei pendente tan razaun laiha Konbustivel.
“Ami preokupa tebes ho situasaun hirak ne’e, maka ami hakarak fanun na’i ulun sira atu labele husik Povu balun moris iha terus no susar laran. Iha sorin seluk ami ladun satisfas tamba despaixu sai ona iha loron 12 Fulan Janeiro liu ba maibe to’o agora Ekipa husi IGE seidauk to’o fatin akontesimentu, sera ke ami nia preokupasaun hirak ne’e la nesesariu atu tulun? dala ida tan husu tau konsiderasaun ba preokupasaun ne’e ho seriedade” Rui deklara.
Komunidade no Juventude sira iha Fatumea tau Esperansa ba Governu liu husi IGE atu iha tempo badak ekipa husi IGE bele halo ona normalizasaun ba estrada ne’ebé at iha Suku Fatumea, Aldeia Fatumea, Postu Administrativu Fatumea,
Xefe Suku Fatumea Julio da Costa Nunes via telefoni Informa, estrada monu iha Suku Fatuema ne’e kuaze metru 20 resin, ne’ebé maak durante komunidade sira uja hodi halo movimentu ligasaun ba Postu, Alende ne’e mos durante besik fulan ida ona, transporte publiku labele asesu estrada ne’e hodi halo viazen husi Postu Administrativu Fatumea ba Postu Fohorem hodi liu ba Kapital Munisipiu Covalima.
“Estrada ne’e monu besik metru 20 resin, ida ne’e ami uza hodi la’o husi Suku Fatumea ba postu, no mos husi Postu Fatumea ba Postu Fohorem, agora Kareta labele liu husi ne’e besik fulan ida ona” informa Xefe Suku Fatumea.
Xefe Suku Fatumea haktuor Alende rai halai rezulta estrada kuaze metru 20 resin ne’e, alende rai halai laos estraga deit estrada maibe estraga mos komunidade agrikultura nia to’os besik metru 10 resin ne’ebe nakonu kuda maek iha to’os laran.
Xefe Suku Fatumea sublina Servisu Munisipal Obras Publiku ba halo observasaun no sukat ona estrada ne’ebé at inkului monu ne’e hamutuk metru 200 resin. Maibe to’o agora seidauk iha makina pezadu mak governu desloka ba Fatumea hodi halo Normalizasaun ba Estrada refere.
Lider komunitaria ne’e husu ba Governu liu husi IGE atu bele tun lalais ba terenu hodi normalizaun ba estrada ne’ebe oras ne’e kondisaun grave, atu nune’e komunidade bele utiliza fali hanesan babain.
“Obras Publiku husi Munisipiu mai sukat ona iha dia 09 ne’e, ami sukat hamutuk metru 250, depois sira dehan sukat hotu sei lori ba nasional maka IGE mai fali halo normaliza, maibe to’o agora seidak mai, ho kondisau estrada ne’ebe at ne’e kareta la tama iha Fatumea besik fulan ida ona” Xefe Suku Fatumea hateten.
Komunidade no Juventude sira iha Fatumena husu Primeiro Ministro Taur Matan Ruak, Ministro Obras Publika, Presidente IGE atu fo konsiderasaun ba preokupasaun povu Fatumea liu-liu konaba estrada.
Entertantu to’o notisia ne’e publika sei dauk hetan konfirmasaun husi parte InstitutuGestaunEkipamentu (IGE).(Azu)
