COVALIMA—-Xefe Departamentu Jestaun Programa Edukasaun Mumisipiu Covalima, Grigorio Ferreira, hateten, oras ne’e daudaun iha Covalima sei dauk bele implementa programa merenda eskolár ba ano letivu 2023, tanba eskola rua sei dauk entrega lista ba Ekipa Jestaun Programa (EJP) ba Servisu Munisipal Edukasaun Covalima.
“Iha Covalima eskola rua mak sei dauk entrega lista ba EJP atu hodi bele implementa programa merenda eskolár, eskola rua seidauk entrega lista ho razaun tanba hela dook husi munisípiu, maibé kontaktu ona sira atu entrega“ informa Xefe Departamentu Jestaun Programa Edukasaun Mumisipiu Covalima, Grigorio Ferreira ba Jornalista sira iha nia kna’ar Covalima Sesta (20/01).
Nia dehan eskola rua seidauk entrega lista ne’e mak hanesan eskola ida iha Suku Dato Tolu Postu Administrativu Fohorem, no eskola ida seluk iha Postu Administrativu Fatumea.
Nia haktuir, bainhira eskola sira estabelese hotu ona Ekipa Jestaun programa (EJP) no iha ona orsamentu bele hahú implementa ona programa merenda eskolár iha tinan 2023.
“Ha’u hanoin estabelese hotu ona EJP no iha orsamentu ita bele implementa ona programa merenda eskolár agora seidauk fiksu tanba seidauk finaliza estabelese EJP ita sei hein Fatumea no Dato Tolu maka seidauk entrega lista” nia hateten.
Antes ne’e, implementa programa merenda eskolár kada estudante $ 0,25 sentavos maibé agora ba tinan 2023 iha mudansa ba ona $ 0,42 sentavos fahe ba $ 0, 35 sentavu ba alimentasaun no sentavu hitu (7) ba administrasaun.
Implementa programa merenda eskolár jere husi ekipa jestaun programa, servisu edukasaun Covalima halo de’it monitorizasaun ne’ebé sei implementa durante loron 164
Nia espera eskola hotu ajuda EJP bele implementa programa merenda eskolár buat hotu EJP mak sei jere ekipa ponto fokal tau matan de’it.
“Ami ho administradór sei haruka proposta ba ministériu atu hamenus loron 164 ba loron 150 atu nune’e eskola hotu iha Covalima bele han hotu, hahú eskola públiku no eskola katólika sira no eskola pre-eskolár sira” nia dehan.
Antes ne’e tuir dadus iha tinan 2022 servisu edukasaun Covalima implementa programa merenda eskolár iha eskola hamutuk 37 kompostu hosi Edukasaun Ensinu Báziku Central (EBC) no pre-eskolár (EPE) privadu no públiku ,iha Munisípiu Covalima implementa programa merenda eskolár.
Totál alunus EBC ho nia filial iha Covalima hamutuk na’in-14, 283, Eskola pre-eskolár públiku ualu (8) ho totál alunus nain-567 no eskola pre-eskolár pribavada 10 ho totál alunus na’in-458.(Azu)
