Covalima (RCCT) 05-07-24-Eskola Sekundaria Geral Publiku (ESGP) Suai simu ona apoiu kadeira hamotuk unidade 240 no meja hamutuk unidade 240 husi governu liu husi Ministeriu Edukasaun (ME).
Diretór Eskola Sekundaria Geral Publiku (ESGP) Suai, Fernando Fereirra, informa husi meja no kadeira unidade 240 ne’e, eskola sentral sei aloka meja no kadeira hamotuk unidade 60 ba klase paralela salele.
“Konaba kadeira ne’ebé Ministeriu Edukasaun fo mai Eskola Sekundaria Geral Publiku Suai tanba liu husi ami nia pedidu ne’ebé hato’o iha semana hirak liu ba no mos iha semana rua ka tolu liu ba Ministra Edukasaun to’o rasik eskola ida ne’e hare katak eskola ida ne’e presija duni kadeira ho meja, ho ida ne’e maka ohin dadersan maizumenus tuku 8 ekipa husi Ministeriu Edukasaun hatun ona kadeira ho meja iha fatin ida ne’e hamutuk 240, ne’e kadeira 60 eskola sentral sei koloka ba klase Paralela Salele,” informa Diretor Eskola Secundaria Geral Publiku (ESGP) Suai, Fernando Fereirra, ba jornalista iha nia knar fatin ESGP Suai Sesta (05/07).
Nune’e Diretor Eskola Sekundaria Publiku Geral Suai, Fernando Ferreira louva ho apoiu Kadeira no Meja ne’ebé Governu liu husi ministeriu edukasaun fo hodi fasilita estundate hala’o prosesu aprendizajem iha eskola.
“ami mos agradese ba ministeriu edukasaun tanba nia esforsu tomak tulun ona eskola sira ne’ebé agora halerik hela liliu konaba kadeira ho meja no agradese ba governu dasia ne’ebé lideradu husi Maun Boot Kay Rala Xanan Gusmão fo ona atensaun ba iha setor edukasaun tanba hanesan setor ida ne’ebé importante atu lori dezenvolvimentu ita nia nasaun ba oin, sim ho kadeira 200 resin ne’e signifika katak atende ona pursentu 100 maibe pelu menus bele iha pursentu 95 bele atende ona ami nia alunus sira bele tuur ona iha fatin di’ak hodi simu prosesu aprendisajem hanesan baibain, husi eskola nafatin husu ba munisteriu edukasaun atu bele tau atensaun ba eskola sira ne’ebé sei dauk iha kadeira ho meja ho nune’e ita hotu bele hetan kadeira no mos estudante sira bele tuur iha fatin hodi simu prosesu aprendisajem lao ho di’ak” tenik nia.
Iha fatin hanesan Kordenador Eskola Sekundaria Geral Publiku (ESGP) Suai Klase Paralela Salele, Daniel Cardoso, dehan maske hetan ona kadeira no meja hamotuk 60 husi eskola sentral maibe seidauk sufisiente ba numeru estudante sira iha klase paralela salele.
“Agradese no obtrigado ba parte ministeriu edukasaun ne’ebé suporta ona kadeira ho meja mai ami liliu ba eskola sentral, tanba servisu hamutuk entre eskola sentral ho klasse paralela Salele maka ohin hetan duni kadeira ho meja hamutuk 60 ne’ebé maka desloka ona ba iha eskola klasse Paralela Salele, ha’u sente ba numeru kadeira, meja ne’ebé ami hetan ba ami seidauk sufsiente, tanba ami presija hela bazeia ba numeru estudante iha, agora daudaun numeru estudante iha eskola Klasse Paralela Salele hamutuk ema na’in-383 ne’ebé ami presija hela karik ba oin nafatin ami ejiji atu nune’e bele hetan kadeira no meja bazeia ba estudante ne’ebé iha” nia haktuir.
Entretantu total estudante iha eskola Sekundaria Geral Publiku Suai hamotuk ema n’ain-2.317, ne’ebé fabe ba iha eskola sentral iha estudante na’in-1.934 no Klasse Paralela Salele hamutuk estudante na’in-383.
Jornalista : Julio Salinas
