COVALIMA—-Diretor Eskola Sekundaria Geral Publika Suai Francelino Freitas Carvalho, Eskola Sekundaria Geral Publika (ESGP) Suai Segunda (09/01) feira ne’e hahu halo inskrisaun ba estudante foun ba ano letivu 2023.
Nia afirma foin iha loron 5 fulan Janeiru 2023 parte eskola konvoka reuniaun ho inan-aman hodi relata ezekusaun orsamentu ano letivu 2022 nian ba inan-aman sira ho aumesmu tempu parte eskola halo planu ba ano letivu 2023 ligadu mos ba iha propinas ne’ebe iha momentu ne’eba inan-aman ho parte eskola deside $ 3.25 ba tinan estudante nain ida sei selu osan propinas ho montante $ 39.00, aumenta tan ho kontribuisaun balun hanesan kontribuisaun ba osan bee, osan siensia pratika nian, desportu ho Konsellu estudante hamutuk $ 5. 00 tanba ne’e total orsamentu ba inskrisaun ne’e kada estudante selu ba iha tinan ida nia laran ho montante hamutuk $ 45. 00.
“Ba planu inskrisaun simu estudante foun ano letivu 2023 nian hanesan ita haree hahu ohin loron 9-14 de Janeiru 2023 halo prosesu estudante foun no ba tinan ida ne’e ami loke tan eskola paralela rua ida iha Sanfuk no ida seluk Salele, tanba iha fatin inskrisaun ne’eba ami loke loked 3, ida ba eskola sentral, loked iha ba eskola paralela Salele ho Sanfuk” informa Diretor Eskola Sekundaria Geral Publika Suai Francelino Freitas Carvalho, ba jornalista sira iha nia kna’ar ESGP Suai.
Francelino haktuir ba planu ba tinan ida ne’e ESGP sei simu estudante ba iha eskola paralela Salele sei simu estudante hamutuk ema na’in-200, Sanfuk mos hamutuk ema na’in-200, maibe ba iha eskola central sei simu estudante foun ema na’in-600.
Nia sublina karik numeru estudante foun mai liu fali numeru ne’ebe parte eskola deside, ESGP hanesan eskola publiku parte eskola labele taka dalan ba povu nia oan atu mai eskola iha eskola central no paralela rua ne’e tenke simu nafatin.
Francelino afirma ho loke tan eskola paralela rua ba futuru sei rekruta mos profesores sira atu bele hodi hanorin estudante sira iha eskola paralela rua refere.
“Kolokasaun profesores ba iha eskola central no paralela rua ne’e sei iha impaktu, jatamente impaktu ne’e iha tanba aumenta numeru estudante ho loke espasu eskola paralela rua, maibe iha aprezentasaun orsamentu ami fo espasu mos ba halo rekrutamentu ba profesores sira” nia haktuir.
Nia dehan kona-ba kolokasaun profesores/a ne’e sei haree ba iha numeru inskrisaun, eskola indika ona responsavel parte paralela Salele nian maka Profesor Amaro da Cruz Lelo no responsavel ba iha paralela Sanfuk nian maka profesora Ana Vong ho nia tekniku administrativa maka Progesor Rui Lemos no Tezoreiru Sergio Amaral.
Francelino sublina eskola kordena ona ho parte eskola ho mos inan-aman ho rua hanesan Salele ho Sanfuk pozitivu katak iha Salele sei uza edifisiu EBC Salele nian no iha Sanfuk sei utiliza EBF Sanfuk. (Azu)
