Covalima (RCCT) 07-01-25-Hahu iha anu letivu 2023,2024 to’o anu letivu 2025 Eskola Sekundaria Jeral Publiku (ESGP-Sigla Portuguesa) Suai kontiua fa’an bote no sapeu ba estudante foun sira ho folin folin $ 1,50 kada Sapeo no $ 1,50 nune’e kada estudante foun ida tenki hatama osan $ 3,00 molok tuir orientasaun.
Profesor Mata Dalan Konsellu Estudante ESGP Suai, Julião Cardoso, informa katak iha tinan ida ne’e (2025) Eskola liu husi Konsellu estudante kontinua fa’an bote no sapeo ba estudante foun hamotuk ema na’in 530.
“Liga ho orientasaun ne’ebe ami hala’o husi diresaun eskola fo kompetensia ba profesor sira ho konsellu estudante atu organiza orientasaun ida ne’e, estudante foun ema na’in-540, husi numeru ida ne’e iha estudante ne’ebé foti bote ho sapeo iha eskola hamutuk ema na’in-530. Ami fa’an bote ho sapeo ne’e hanesan sasan fundraising, hahu kedas iha tinan 2023, 2024 to’o agora tama ona ba 2025, bote no sapeo sira ne’e ami fa’an ba estudante sira ho folin dolar tolu, ninia ezekusaun osan ne’e maka ba halo atividade orientasaun nian” Relata Profesor Mata Dalan Konsellu Estudante ESGP Suai, Julião Cardoso, ba jornalista sira iha ESGP Suai (06/01).
Nia afirma estrutura konsellu estudante mak responsabeliza ba osan husi fa’an bote no sapeo ne’e hodi jere ba seksaun hirak ne’ebé estabelese ba atividade orientasaun.
“Osan ne’e direita husi estrutura konsellu estudante maka kaer profesor sira balu laiha interven atu kaer osan ne’e, tan ne’e jere orsamentu ida ne’e liu husi sira konsellu estudante maka jere, husi orsamentu ne’ebé hetan pasa ba iha estrutura ne’ebé hari ona liu husi seksaun sira, hanesan ba seksaun konsumu, seksaun saude, lojistiku pasa ba seksaun sira ne’e maka hodi hala’o atividade ida ne’e, tanba ita hatene katak eskola laiha osan atu hodi hala’o atividade orientasaun ne’e, maibe liu husi osan income (bote ho sapeo) ne’e maka ami hodi hala’ao atividade orientasaun durante loron 6 nia laran ne’e” nia dehan.
Entretantu iha anu letivu 2025, Eskola Sekundaria Jeral Publiku (ESGP-Sigla Portuguesa) Suai, Simu estudante foun bazeia ba despaisu husi Ministeriu Edukasaun ne’ebé orienta eskola simu deit estudante foun hamotuk ema na’in 540, tan ne’e, iha atividade orienstasaun ba estudante foun iha ESGP Suai, Iha Estudante na’in 530 mak sosa bote no sapeo husi eskola, engkuantu estudante na’in 10 seluk sosa rasik husi fatin seluk.
Jornalista : Julio Salinas
Editor : Chamot Nahac
