COVALIMA—Tuir planu Eskola Sekundáriu Gerál Públiku (ESGP) Suai sei halo rekrutamentu ba profesór kontratu na’in-sanulu (10), atu hodi koloka profesór ba eskola paralelu rua ne’ebé foin estabelese.
“Ita halo rekrutamentu ba profesór sira ne’e, tanba agora responsavél eskola paralelu rua ne’e, sira halo kolokasaun profesór liu husi, ha’u nia adjuntu diretór no Xefe gabinete sei halo planu hodi halo kolokasaun ba profesór, hira mak atu koloka ba eskola paralelu 2 no na’in hira mak iha eskola sentrál ”, Diretór ESGP Francelino Freitas Carvalho, ba jornalista sira iha ESGP suai, kuarta (11/01).
Nia dehan, razaun eskola halo rekrutamentu ba profesór konstratadu sira ne’e, tanba bainhira adjundu no xefe gabinete halo planu kolokasaun profesór ba eskola paralelu rua, entaun profesór menus iha eskola sekundáriu, nune’e presiza atu halo rekrutamentu.
Eskola iha planu halo rekrutamentu bazea ba nesesidade eskola, tanba eskola rasik iha orsamentu uitoan atu halo rekrutamentu ba profesór kontratadu sira.
Prosesu rekrutamentu eskola sei loke vaga ba públiku, nune’e Covalima oan sira ne’ebé iha kapasidade, bele konkore ba vaga ne’ebé eskola sei fó sai, hodi halo teste hahú selesaun dokumentu to’o iha simulasaun.
“Ami iha orsamentu uitoan ne’ebé ami prevee atu halo rekrutamentu nune’e vaga ami sei loke ba públiku hodi fó oportunidade ba Covalima oan tomak hakarak konkore ba vaga hodi tuir teste hahú iha faze selesaun dokumentu to’o simulasaun” nia dehan.
Tuir dadus profresór iha eskola sekundáriu Jerál Públiku Suai hamutuk ema na’in-85 konpostu husi profesór permanente na’in-31, profesór parsiál na’in-31 no profesór kontratadu na’in-25.
Enkuantu dadaun ne’e eskola sekundáriu jerál públiku Suai hahú halo ona inskrisaun ba estudante sira ba priódu tinan 2023 ne’ebé hahú iha loron (9/01/23) sei remata iha loron (14/01/23).(Azu)
