Covalima (RCCT), 29 Setembru 2026 — Emprezáriu lokál sira ne’ebé implementa projetu Planu Dezenvolvimentu Integradu Munisipál (PDIM) preokupa ho aumentu folin simentu iha Munisípiu Covalima, ne’ebé antes fa’an ho folin US$4,50 no agora sa’e to’o US$7 kada saku.
Emprezáriu lokál husi Empreza Futuru Mane Mesak, Yuliana Inosensia Justina Hoar, hateten katak aumentu folin simentu fó impaktu diretamente ba implementasaun projetu sira, tanba iha tempu halo negosiasaun bazeia ba BOQ, folin simentu sei iha US$4,50 kada saku.
“Ha’u sente triste tebes tanba folin simentu sa’e maka’as ne’e fó impaktu ba implementasaun projetu. Iha momentu halo negosiasaun ba BOQ, folin simentu sei US$4,50, maibé agora simentu sa’e no ami la hatene razaun,” nia hateten ba jornalista sira iha Covalima.
Nia husu Governu atu haree no tau atensaun ba situasaun aumentu folin simentu ne’e, tanba bele fó impaktu ba sustentabilidade empreza lokál sira no bele halo implementasaun projetu sira para.
Iha parte seluk, na’in Empreza Loro Nabilan, Rude de Sousa, dehan aumentu folin simentu mós fó impaktu ba empreza lokál sira ne’ebé implementa projetu PDIM.
Nia hateten katak, depois de lansamentu projetu Ponte Bakula, folin simentu ne’ebé antes US$4,50 sa’e ba US$7 kada saku.
Atu implementa projetu PDIM, empreza lokál sira sosa simentu iha Dili ho folin besik US$4,40 kada saku. Maibé, tanba tenke lori husi Dili mai Suai, loja sira fa’an fali ho folin entre US$6 to’o US$7 kada saku.
Enkuantu na’in loja, Dulce Maria Lay, esplika katak aumentu folin simentu akontese tanba sosa iha Dili ho folin US$4,40 no tenke aumenta kustu transporte, inklui selu traballadór sira ne’ebé hatún no organiza saku simentu.
“Ho folin simentu sa’e, ami mós preokupa tebes tanba komunidade sira husu ami atu hatún folin simentu. Maibé ami mós hetan lukru ki’ik liu,” nia dehan.
Aumentu folin simentu ne’e sai preokupasaun ba emprezáriu no komunidade iha Covalima, ne’ebé husu autoridade relevante sira atu tau atensaun ba situasaun ne’e, liuliu tanba nia bele afeta implementasaun projetu dezenvolvimentu iha munisípiu.
Jornalista: Paul Mandeu
