Covalima (RCCT) 22-09-23–Relasiona ho Ekipa konjunta prende kareta hat tula sasan importadu tama husi Froteira Postu Integradu Salele ne’ebé konsidera elesitiu kontra bandu, tanba laiha lisensa ka sasan sira ne’e laiha packing List, nune’e ekipa konjunta asegura ona kareta tronto rua ho sasan sira mak konsidera ba elisito kontra bandu ne’e iha komando PNTL Covalima iha loron 15 fulan setembru foin lalais.
Tanba ne’e Reprezentante emprezariu sira iha Covalima, Alberto de Jesus lamenta konsidera servisu Alfandega iha Fronteira Postu Ingradu Salele la masimu tanba sasan sira mak laiha lisensa mos bele tama liu husi odamatan bo’ot fronteira mai Covalima.
“Importador sira hatama sasan mai iha Suai Covalima laiha laiha PEB, ida ne’e hatudu katak servisu Alfandega iha Covalima iha fronteira Mota Masin la masimu tanba sasan sira ne’e bele livre tama iha ho montante ida ne’ebé barak la halimar” informa Alberto de Jesus ba jornalista sira foin lalais ne’e.
Tanba ne’e Alberto husu ba Ministeriu Finansas (MF) atu halo investigasaun ba funsionariu Alfandega iha fronteira Salele, ralasiona ho sasan sira ne’ebé husik livre tama husi Indonezia mai iha Covalima maske laiha Packing List ka PEB.
“Ha’u hanoin MF ka ministeriu kompetente sira ne’ebé servisu halo ligasaun ho Alfandega nian tenke seriu atu bele halo investigasaun ba sira tanba saida mak ida ne’e bele akontese, hau hanoin durante ne’e Alfandega halo buat ne’e akontese beibeik ona, hanesan Cpvalima oan lakohi buat ne’e atu akontese tan iha futuru mai tan ne’e husu atu investiga klean ba Alfandega” nia husu.
Relasiona ne’e, Diretor Servisu Alfandega Munisipiu Covalima, Nuno Noqueira, hatete durante ne’e alfandega implementa sistema jestaun risku katak verifikasaun no inspesaun iha Frontira ne’e Alfadega hala’o pursentu 100, signifika sasan sira iha kareta laran ne’e hatun hotu.
Nia mos dehan sei halo investigasaun ba Funsionariu Na’in rua ne’ebé halo verifikasaun ba sasan importadu tama Covalima iha Loron 13 fulan Setembru foin lalais.
“Alfandega rasik implementa jestaun ne’e katak iha merkadoria sistema identifika kareta ho numeru xapa ida hanesan ne’e ninia verifikasaun pursentu 100, ida ne’e signifika sasan sira ne’ebé iha kareta laran ne’e tun hotu mai, segundu iha ne’eba ne’e prioridade rua, ne’e pursentu 50 deit mak halo verifikasaun no iha parte terseiru iha pursentu 25 deit halo verifikasaun, kona ba intervensaun husi maluk sira komersiu nian no iha momentu ne’e kedas ha’u informa ba komisariu no atu halo identifikasaun ba pesoal sira ne’ebé halo verifikasaun ba kareta sira lori sasan tama mai ne’e”. Diretor Servisu Alfandega Munisipiu Covalima, Nuno Noqueira, esplika Kinta (21/09) iha nia servisu fatin Fronteira Postu Integradu Salele.
Entertantu Emprezariu Covalima oan manifesta hasoru Alfandega relasiona ho kareta tronto rua ne’ebé tula sasan impartadu tama husi Indonezia mai iha Covalima, maibe sasan barak maka hakerek laiha packing list maibe funsionariu sira ne’ebé servisu iha pontu entrada Salele husik tama livre iha area juridiku Covalima maske sasan hirak ne’e konsidera tama illegal.
Jornalista : JS
Editor : CN
