COVALIMA-(RCCT) 31-10-23—Komandante Polisia Nasional Timor Leste (PNTL) Munisipiu Covalima Superientendente Polisia, Calisto Gonzaga, hatete relasiona ho eleisaun orgaun suku ba periudu 2023-2030 foin liu ba ne’e, iha Covalima la’o ho di’ak, maske mosu dezentendimentu balun iha sentru votasaun.
Komandante Munisipiu dehan mosu insatisfasaun balun iha sentru votasaun husi eleitores sira kona ba sistema maibe ida ne’e la fo impaktu ba susesu eleisaun orgaun suku iha Munisipiu Covalima.
“Foin lalais ultrapasa ita nia atividades ba eleisaun hili ita nia lideransa iha nivel aldeia no no nivel suku, hahu husi loron 28 to’o ba kontajen apuramentu iha sentru votasaun, depois halo kontajen apuramentu iha nivel suku, situasaun sira la’o di’ak, iha dezentendimentu ki’ik oan balu ne’ebé akontese iha sentru votasaun balu hanesan iha Suai no mos iha postu administrativu sira seluk ne’e tanba deit insastifasaun husi ita nia eleitores sira, ida ne’e la’os sala eleitores sira nian maibe ne’e tanba sistema ho tempu 9 oras loke, depois tuku 3 loro kraik taka, maibe eleitores sira ne’e forma tama ona iha kluna laran ne’e kontinua to’o vota hotu maibe ita nia eleitores sira balu tama ona ba oras hale’u tuku 4 ou 5 foin mai husi uma atu ezerse sira nia direitu votu, ida ne’e mak ita nia intervensaun la autoriza atu kontinua vota, tanba ida ne’e ita konsidera invalidu ona” Komandante Polisia Nasional Timor Leste (PNTL) Munisipiu Covalima Superientendente Polisia, Calisto Gonzaga, afirma lia hirak ne’e hafoin halo enkontru kordenasaun ho entre PNTL, KRAM no organizasaun arte marsiais sira iha Covalima.
Komandante ne’e subliña Covalima hetan susesu ba eleisaun suku tanba iha kontribuisaun husi entidades hotu tantu autoridade, organizasaun oi-oin liliu ho joventude sira hodi hetan rezultadu maka iha suku 24 mak sei avansa ba segundu volta ne’ebé sei akontese iha loron 13 fulan Novembru 2023.
“Husu ba ema hotu-horu liliu ba ita nia alin joven sira balu involve iha arte marsiais no arte ritual sira no joven baibain hotu-hotu ita rona malu no fin ita hetan susesu ba ita nia Munisipiu Covalima kona ba eleisaun ida ne’e, eleisaun ida ne’e nia rezultadu iha suku 24 sei tama fali iha periudu daruak nian, ita sei vota fila fali ba suku 24 para hli ita nia xefe suku, ba xefe aldeia sira rezolvidu ona tanba lei hatete hahu husi kontajen apuramentu iha sentru votasaun ba xefe aldeia maka impata hahu kedas iha ne’e ita vota fila fali, tanba ne’e iha 148 xefe aldeia ne’e rezolvidu hein katak depois 15 dias monu iha loron 13 fulan Novembru ita hahu fali kontinua eleisaun suku ba xefe suku sira” nia dehan
Entertantu durante eleisaun suku iha Covalima la’o di’ak maske mosu naksalak balu la’os atu hodi impede festa demokrasia ba eleisaun suku nian maibe mosu insastifasaun eleitores sira konaba sistema manual ba prosesu eleisaun orgaun suku.
Jornalista : Julio Salinas
Editor : Chamot Nahac
