COVALIMA—-Diretór Servisu Edukasaun Munisípiu Covalima, Rui Amaral Suri Seran, Hateten liu husi enkontru nivel eskolar parte edukasaun fo ona orientasaun ba iha eskola hotu sei la autoriza atu inan-aman sira buka osan hodi sosa farda ba oan sira hodi mai eskola.
“Despaisu husi Ministru Edukasaun Juventude no Desportu hau sei dauk hetan to’o agora, maibe liu husi enkontru nivel eskolar fo ona orientasaun ba eskola hotu sei la autoriza atu inan-aman halibur osan hodi sosa farda ba estudante sira” deklara Diretór Servisu Edukasaun Munisípiu Covalima, Rui Amaral Suri Seran, ba jornalista sira iha Administrasaun Munisípiu Covalima, Sesta (06/01).
Diretór hein Edukasaun afirma agora hein despaixu husi Ministériu tun mai maka sei haree farda uniforma Munisípiu Covalima nian ne’e atu uza uniforma ida ne’ebe, maibe ida ne’e ministeriu mak sei hasai despaixu.
Nia dehan estudante sira ne’ebe atu uza uniforma ne’e sei hahu husi pre-eskolar to’o eskola sekundaria jeral no eskola tekniku vokasional sira hotu iha Covalima.
Nia afirma edukasaun la autoriza atu eskola sira haruka inan-aman sosa farda ba estudante sira, ministru mos hatun ona orientasaun mai Diretór Edukasaun hotu fo ona atu orientasau ba diretor eskolar sira labele kobra osan husi inan-aman hodi sosa farda iha liur maibe MEJD mak sei hasai despaixu hodi sosa farda ba estudante sira.(Azu)
