COVALIMA—-Vise-Prezidente EDTL.EP Humberto Pereira informa ba futuru Eletricidade de Timor –Leste Empreza Públika (EDTL-EP) sei estabelese sentru venda pulsa eletrisidade iha nivél suku sira hodi fasilita kliénte.
“EDTL.EP iha planu atu estabelese sentru venda eletrisdade kada aldeia iha nivél suku atu hodi fasilita komunidade (kliente) sira ne’ebe uza prepagu, ita iha planu atu estabele sentru venda pulsa eletrisidade .Ita iha komisaun ezekutivu halo desizaun no deliberasaun estabele sentru venda sira ne’e iha suku nune’e fasilita kliente labele la’o dook husi postu ba munisípiu” dehan Vise-Prezidente EDTL.EP Humberto Pereira ba jornalista iha aldeia Lela, suku Holpilat, postu Maucatar , sesta (13/01).
Nia haktuir EDTL.EP atu estabelese sentru venda iha suku, tanba atu fasilita kliente sira, bainhira atu sosa pulsa eletrisidade husi postu la presija mai munisípiu hodi gasta osan ba transporte.
Estabelese sentru venda sira ne’e mínimu iha suku nune’e bele fasilita kliente sira sosa besik, tanba ne’e EDTL E.P fó prióridade estabelese sentru venda iha suku sira.
EDTL.EP fó ona orientasaun ba tékniku sira iha munisípiu atu halo sensibilizasaun kona–ba estabelese sentru venda pulsa eletrisidade suku sira, iha tempu badak .
“Iha semana kotuk ita enkontru ho kargu xefia nivél munisípiu no nasionál, ita atu implementa, maibé agora ita sei estabelese nia regra mínimu kada departamentu molok atu implementa” nia informa.
Kritériu atu estabelese sentru venda atu sai kliénte hodi faan pulsa eletrisidade halo akordo ho EDTL.EP no mós deposita nia osan mínimu $ 2000, sidadaun Timor-oan, iha komputadór no printer rasik.
EDTL.EP mós sei servisu hamutuk ho operadór Telemor ,Timor Telekom, no Telkomcel asesu liña internet nune’e evita kliénte sira gasta osan ba transporta hodi sosa pulsa eletrisidade.
Abitante iha Aldeia Lela, Suku Holpilat Candido Gusmão sente triste, tanba EDTL.EP instala ona prepagu iha suku no to’o aldeia sira, maibé seidauk estabele sentru venda pulsa eletrisidade iha suku no aldeia sira.
“Ami sente triste maske EDTL.EP instala ona prepagu ba abitante sira iha suku no aldeia maibé sira la estabelese sentru venda pulsa tanba ne’e ami tenke gasta osan transporte atu sosa pulsa eletrisidade iha munisípiu”, nia dehan.
Suku Holpilat iha nia aldeia hanesan Aldeia Hatu, Lela, Nainare, Manulor, Leogore ho fatuk-oan ho nia populasaun 2,7254.(Azu)
