Covalima (RCCT) 07-05-21 Relasiona ho númeru kazu covid-19 nebe sa’e maka’as iha Municipio Covalima, Ministério Edukasaun juventude no Desporto (MEJD hatun despaixu hodi suspende aktividades ensinu aprendizasem iha eskola sira iha municipio covalima.
Ko’alia ba Radio Cova Taroman Diretor Servisu Edukasaun Municipio Covalima Edmundo Perreira iha nia kna’ar fatin hateten, Despaixu husi MEJD suspende aktividades Ensinu aprendizasem iha Eskola sira, tanba ho prinsípiu ida katak, eskola labele sai agente transmisaun ba Covid-19.
“ Aktividades iha eskola sira ne’e suspende hotu, tanba ida ne’e Despaixu Ministerio nian, tanba agora dadaun numeru kazu Covid-19 ne’e sae maka’as, tanba ita nia Ministro mos hatete katak, Eskola labele sai agente transmisaun ba Covid 19 ba populasaun sira ” Dehan Diretur Edmundu
Enkuantu Diretor Edukasaun Servisu Municipal ne’e informa, tuir despaixu husi MEJD, Eskola sira iha Covalima sei reativa fali iha Loron 16 Fulan Maio.
“ ita nia Estudante sira sei tama fali eskola iha Loron 16 fulan ne’e, maibe depende ba progressu kazu ne’e, se karik aumenta entaun ita nia MEJD sei adia fali ” Tenik Nia
Diretor ne’e konsidera situasaun agora dadaun ne’e, fo impaktu bo’ot ba Estudante sira, tanba estudante sira la hetan matéria foun husi Professor/a sira tuir konteúdu nebe iha kuríkulum.
“ Ha’u sente Situasaun agora ne’e fo impaktu bo’ot ba estudante sira, tanba estudante sira la hetan material foun husi Professor/a sira tuir konteudo nebe iha kuríkulum, nomos estudante sira la iha vontade atu estuda.”Nia Salienta
Relasiona ho Situasaun ne’e, Diretor Edukasaun Municipio Covalima husu ba Estudante sira hotu iha Covalima, atu nafatin estuda matéria nebe maka Professor/a sira fo, atu nune’e labele prezudíka ba sira nia aproveitamentu durante suspensaun ba kazu Covid 19.
Jornalista : Tynho Gusmão & Aje Ferreira
Editor : Chamot Nahac
