Kordinator Programa Pradet Fatin Hakmatek Suai, Imelda Imaculada Moreira, relata durante halo atenmentu ba munisipiu 3 mak hanesan Munisipiu Ainaro, Covalima no Manufahi.

“Durante fulan ne’e nia laran hahu husi Janeoru-Junu 2024 Fatin Hakmatek Suai rejistu kazu ne’ebe aas liu maka violensia domestika, kazu sira ne’ebe durante fulan 6 ami atende maka hanesan violensia domestika, violensia sexual, insestu no mos abandona, kazu violensia domestika iha ne’ebé ami atende total kazu hamutuk 23, iha kazu abandona, insestu no violensia sexual ida ne’e la’os akontese iha uma laran maibe akontese halo husi ema seluk, prosesu kazu hotu ami atende ami refere ba iha parseiru sira hanesan ALFELA, ho VPU sira maka rejistu iha Ministeriu Publiku no prosesu iha ne’eba ne’e sira maka bele akompaña ba iha tribunal, ne’ebé Fatin Hakmatek Suai nia prosesu to’o deit iha atendimentu halo ezaminasaun hotu ami refere, karik iha ona prosesu julgamentu hotu no hetan ona pena prizaun sira ne’e parseiru sira foin update mai ami, no iha fulan 6 nia laran ne’e ami refere vitima na’in-2 ba iha Uma Mahon Salele” dehan Kordinator Programa Pradet Fatin Hakmatek Suai,Imelda Imaculada Moreira, ba jornalista iha nia knaar fatin Pradet Fatin Hakmatek Suai, Sesta (12/07).

Nia haktuir durante ne’e infrenta difikuldade konaba flow up basa lakon liña kontaktu ho vitima sira.

“Bainhira ami halo flowup dala ruma vitima sira rasik maka mai iha ami nia fatin sira fo numeru telefoni, maibe sira fila fali ba uma numeru sira ne’e troka hotu ne’ebé ita telefoni ba laiha informasaun, dala ruma mos sira fila ba uma ne’e ami la lori sira fila maibe husi parseiru sira hanesan ALFELA ho VPU lori sira fila ida ne’e mos difikulta ami atu buka tuir bainhira atu flowup, durante ne’e ami hetan referal husi parseiru dala barak husi VPU, ALFELA, Ministeriu Publiku rasik, Ministeriu Solidaridade Sosial no Inkluzaun, uma Mahon no iha barak vitima sira nain mai hato’o iha Fatin Hakmatek Suai inklui Ospotal Referal Suai kuandu sira hetan vitima sira lori mai iha ne’e” nia esplika.

Entretantu Pradet ka Fatin Hakmatek Suai hanesan organizasaun ida ne’ebé durante ne’e fo asistensia ba vitima violensia sira Munisipiu-3, hanesan Munisipiu Ainaro, Covalima no Manufahi.

Jornalista : Julio Salinas

Editor       : Chamot Nahac