Koordenador Servisu Floresta Munisipal Covalima, Domingos Gusmão relata osan ne’e rekolla husi lisensa negosiu ne’ebé komunidade sira husi ko’a ai teka.

“Reseitas ne’ebé ita hetan iha fulan 6 nia laran ne’e husi ai teka deit ho montante $ 9.575.00, ita hetan osan hirak ne’e mai husi komunidade sira ka’o ai teka hodi fa’an ba emprezariu sira,  seluk husi ida ne’e ita la rekolla liliu konaba ai miis sira ne’e no laiha lelaun ruma kona ba ai” dehan  Koordenador Servisu Floresta Munisipal Covalima, Domingos Gusmão ba jornalista sira iha nia k’nar fatin Kuarta (31/07).

Domingos Gusmão mos esplika konaba preokupasaun ne’ebé guarda Floresta sira hasoru iha terenu maka laiha transporte atu uza hodi kontrolametu iha Terenu.

“Diresaun Floresta Covalima durante ne’e hasoru problema liliu konaba laiha transporte, guarda sira tun ba iha terenu hodi hala’o servisu uza deit transporte privadu, maibe laiha transporte la sai kestaun ba guarda sira, maibe sira nudar guarda floresta tenke obriga hala’o sira nia servisu, tanba ne’e sira nia k’nar tenke hala’o maske iha hasoru limitasaun oi-oin tan sira nia k’nar sira tenke hala’o, ita mos hato’o relatoriu beibeik ba iha nasional konaba ita difikuldade maibe iha diresaun mos limitadu ne’ebé ita hein iha tempu sira sei responde hodi fasilita guarda sira nia halerik ne’e” nia hatete.

Koordenador Servisu Floresta Munisipal Covalima, Domingos Gusmão, mos relata durante fulan 6 dahuluk tinan 2024 ne’e, laiha lelaun tantu ai teka no ai miis, maibe rekolla deit osan husi lisensa negosiu ko’a ai teka ne’ebé komunidade sira hamotuk dolar amerikanu rihun sia atus lima, hitu nulu resin lima hodi hatama ba kofre estadu.

Jornalista : Julio Salinas

Editor       : Chamot Nahac