Covalima (RCCT), 10 Setembru 2026 — Diretór Servisu Autoridade Munisipál Saúde Covalima (DSAMC), Domingos Sequera, husu ba kompanhia sira ne’ebé simu tender ba projetu konstrusaun Sentru Saude liu husi Planu Dezenvolvimentu Integradu Munisipál (PDIM) iha Munisípiu Covalima, atu finaliza konstrusaun tuir tempu ne’ebé determina ona iha kontratu.
“Konstrusaun lao hela. Kona-ba konstrusaun atu la’o to’o persentu hira, tuir estandár ne’ebé mak iha ne’e, PDIM mak hatene liu. Ba ami, ami haree liu ba nia tempu servisu, mak labele liu husi tempu ne’ebé determina ona iha kontratu,” dehan Domingos Sequera.
Iha parte seluk, Domingos Sequera mós ko’alia kona-ba kolokasaun pesoál saúde iha postu saúde sira iha Munisípiu Covalima.
“Tuir planu Ministériu Saúde, kada postu saúde ida koloka pesoál saúde na’in 5. Maibé haree mós ba ita-nia finansas ne’ebé iha. Karik finansa to’o, ita halo rekrutamentu ba pesoál saúde na’in 5 dala ida. Maibé se la to’o, ita koloka pesoál saúde na’in 1 ka 2 ne’ebé ita iha. No ita nafatin halo pedidu ba Ministériu Saúde.
Tanba rekursu umanu ita fahe ba parte 2. Ba rejime jerál ne’e husi Estadu, Prezidente Autoridade Munisípiu nia responsabilidade. Ba profisionál saúde ne’e responsabilidade husi Ministériu Saúde,” nia esplika.
Tuir informasaun ne’ebé jornalista RCCT asesu, iha tinan 2026, Autoridade Munisípiu Covalima, liuhusi Servisu Saúde Munisípiu no Programa Dezenvolvimentu Integradu Munisipál (PDIM), konstrui postu saúde lima (5), inklui rezidénsia ba pesoál saúde.
Postu saúde lima ne’e mak Postu Saúde Fatu-Loro, Cassabauk, Suai-Loro, Matai no Usecai.
Iha projetu hirak-ne’e, Empreza Lifran Unip, Lda. toma responsabilidade ba konstrusaun Postu Saúde no rezidénsia ba médiku iha Suku Cassabauk, ho orsamentu US$ 307.070,33.
Enkuantu ne’e, Empreza Buimaras Implementa implementa projetu konstrusaun Postu Saúde no rezidénsia ba médiku iha Fatuloro, Postu Administrativu Fatululik, ho orsamentu US$ 348.579,78.
Aleinde ne’e, Empreza Titor Unip, Lda. mak konstrui Postu Saúde no rezidénsia ba médiku iha Usecai, ho orsamentu US$ 404.592,05.
Empreza Futuru Mane Mesak Unip, Lda. implementa projetu konstrusaun Postu Saúde no uma ba médiku iha Suku Suai-Loro, ho orsamentu US$ 308.025,59.
Enkuantu Empreza Sabudoi Unip, Lda. implementa projetu konstrusaun Postu Saúde no uma rezidénsia ba médiku iha Suku Matai, ho orsamentu US$ 319.281,54.
Jornalista: Julião Correia
Editor: Paul Mandeu
