Pontu Fokal Meiu Ambiente Munisipiu Covalima Domingos Barreto Goveia Leite “Doser” hatete Kilat Manu (senapan angin) ne’ebe sirkula iha area juridiku Covalima ne’e sidadaun sira hatama liu husi dalan ilegal.
“Iha Covalima ne’e hau la’o laos gava an mais hau la’o, o atu fronteira ka o atu ne’ebe hau tama hotu, kilat manu ne’ebe tama husi Atambua liu husi dalan ilegal mai ne’e mos hau hatene hotu, kilat manu ida nia musan tiru ema mate ne’e mos agora tama ona iha Covalima la sala iha kilat lolon 6 ona karik, iha Aldeia Kulu-Oan iha, parte Zumalai ne’eba iha rua, parte Suai liliu iha Bairo Costa tun mai, Tabako Loot ne’e iha ida ka rua to’o tolu hanesan ne’e iha, mas hau sei buka tuir ema ne’ebe hatama kilat manu ne’e, sira fa’an hatama mai liu husi Lela parte Maukatar, Fatululik no Makokon Fatumea ne’ebe dalan hau hatene hotu” informa Pontu Fokal Ambiente Munisipiu Covalima Domingos Barreto Goveia Leite iha nia intervensaun ba komunidade sira hafoin partisipa iha serimonia kuda ai parapa iha Lagoa We’e Kaduak, Suku Labarai, Postu Administrativu Suai foin lalais ne’e.
Tanba ne’e Doser husu ba komunidade tomak iha Covalima ne’ebé rai maka kilat manu atu entrega ba lider komunitaria ka Offisial Polisia Suku (OPS), tanba wainhira meiu Ambiente hetan mak sei prende no selu multa ba estadu ho osan dolar amerikanu rihun rua atus lima.
“Ha’u fo hatene ba ha’u nia tiun sira, ha’u nia tian sira liliu ba joven sira se maka kilat iha karik bele entrega ba iha imi nia autoridade lokal hanesan xefe aldeia, xefe suku ou OPS di’ak liu duke ha’u tun maka hetan imi lori la’o tuir dalan hetan lori polisia kaer imi multa tan osan ho montante dolar Amerikanu rihun rua atus lima ($ 2.500) depois imi tama tan komarka tinan 6 ne’e imi hakarak ka” nia husu.
Entertantu Pontu Fokal Ambiente Munisipiu Covalima Domingos Barreto Goveia Leite katak kilat manu ne’ebé oras ne’e sirkula iha area juridiku Covalima maioria hatama mai liu husi dalan ilegal hanesan husi Lela, Fatululik, Makokon Fatumea, nune’e mos to’o notisia ne’e hatun jornalista RadioComunidade Cova Taroman seidauk ho konfirmasaun husi parte seguransa kona ba asuntu refere.
Jornalis : Julio Salinas.
Editor : Chamot Nahac
