Covalima (RCCT) 26-01-24-Komunidade kontinua uja kilat manu kasa animal fuik iha alas fo impaktu ba balada sira hanesan kakatua, loriku, Niki no animal sira seluk iha Covalima komesa mohu ba daudaun.

Pontu Fokal Ambiente Munisipiu Covalima, Domingos Barreto Goveia Leite, dehan Animal fuik komesa menus bebeik tanba komunidade sira kontinua sosa subar kilat manu hodi kasa.

“Tuir ambiente nia haree no lao iha parte Postu administrativu 7 ne’e iha Covalima hau hatene no kuidadu animal fuik sira, agora animal fuik sira iha Timor laran ne’e loriku, kakatua, loriku mos laos oin ida deit maibe iha oin tolu, kakatuamos hanesan iha oin rua ka tolu ne’ebe ita nia manu sira ne’e komesa menus ba beibeik tanba ita nia maun alin sira joven sira barak sosa kilat manu (senapan) hodi kasa animal fuik sira arbiru hanesan meda, laku, rusa no animal fuik sira seluk” dehan Pontu Fokal Ambiente Munisipiu Covalima, Domingos Barreto Goveia Leite, hafoin partlisipa iha serimonia kuda ai parapa iha Lagoa We’e Kaduak Labarai.

Nia mos dehan animal fuik sira iha parte bee no tasi mos komesa menus liliu hanesan Lenuk, boek no ikan.

“Parte iha bee no tasi ita haree lenuk iha tasi komesa menus, oinsa mak ita konserva lenuk ne’e bele aumenta tan, tanba lenuk ne’e mos nia musin ne’e ho tempu deit laos loro-loron, paling nia tempu ne’e mak iha fulan Fevereirru, marsu no Abril ne’e tempu ba sira atu tolun, agora ita nia inan aman balun ba kaer boek iha mota kuandu la toman ona boek sira lori fali ai moruk ICON ka veneno sira ne’e hatun ba iha bee laran halo boek boot no kiik oan sira mos mate hotu, oinsa ita nia oan sira ne’e aban bainrua atu kaer fali tan mos boek kiik laiha ona tanba mate hotu ona” dehan Pontu Fokal Ambiente Munisipiu Covalima ne’e.

Tanba ne’e Pontu Fokal Ambiente Munisipiu Covalima, Domingos Barreto Goveia Leite husu ba komunidade hotu iha Munisipiu Covalima labele kasa animal fuik sira iha ai laran ho kilat manu no labele lori ai moruk halanu beibeik ikan no boek sira iha mota laran, kuandu parte ambiente hetan maka sei prende hotu kilat manu no lori ba iha prosesu tuir dalan legal.

Jornalista : Julio Salinas

Editor : Chamot Nahac