Maukatar (RCCT)-28-11-23—Hafoin reprezenta governu sai inspetor da serimonia isar bandeira nasional ba selebrasaun loron proklamasaun Independensia unilateral ba dala 48, iha Postu Administrativu Maukatar, Munisipiu Covalima, Diretór Jeral Ministeriu Obras Publiku Domingos de Jesus Sequiera, rekuñese kondisaun estrada iha Postu Administrativu Maukatar sei at atu fasilita komunidade sira halo viazen ba mai liliu atu lori sira nia produtu lokal asesu ba merkadoria sira iha kapital Munisipiu Covalima.

Maibe, Diretór Jeral iha Ministeriu Obras Publiku Domingos de Jesus Sequiera, rekuñese maske konsidaun estrada ladi’ak maibe hare ba dezenvolvimentu iha Covalima komesa la’o.

“Maske ita nia kondisaun estrada ne’ebé at ho situasaun ida ne’e, ita hahu ho dezenvolvimentu ba ita nia rai espesial iha Munisipiu Covalima komesa la’o, iha situasaun ida hanesan ne’e” nia informa Diretór Jeral Ministeriu Obras Publiku Domingos de Jesus Sequiera ba RCCT iha Maukatar, Tersa (28/11).

Nia haktuir ho kondisaun estrada iha Postu Administrativu Maukatar sei at bainhira fila ba Dili sei relata kondisaun estrada refere ba iha ministeriu.

“Situasaun ida sei hanesan maibe iha governu da sia komesa planu orsamentu kada munisipiu ida-idak no mos estrada sira ne’ebé maka hahu atu dezenvolve, tan ne’e husi ami nia prezensa iha fatin ida ne’e ami mos sei fila hodi hato’o ba ami nia lideransa ministeriu” nia dehan.

Entretantu estrada diresaun Maukatar liga ba Postu Administrativu Fatululik liu ba Munisipiu Bobonaro oras ne’e kondisaun kontinua grave, no iha udan monu, rai halai halo estrada refere sai kuak, nune’e karik iha futuru governu la tau atensaun hodi hadi’a maka estrada sei at liu tan.

Jornalista : Julio Salinas

Editor : Chamot Nahac